सरपंचपदाचा गैरवापर करून कर्तव्यात कसूर प्रकरणी महिला सरपंचा अपात्र…

भंडारा :-सरपंचपदाचा गैरवापर करून कर्तव्यात कसूर केल्याच्या आरोपावरून लाखांदूर तालुक्याच्या

दिघोरी मोठी येथील महिला सरपंचाला अपात्र घोषित करण्यात आले.सदरची कारवाई नागपूर विभागाच्या अतिरिक्त आयुक्तांच्या आदेशावरून करण्यात आली. सुनीता संजय साळवे असे अपात्र महिला सरपंचाचे नाव आहे.

२०२३ मध्ये झालेल्या ग्रामपंचायतीच्या सार्वत्रिक निवडणुकांतर्गत तहसीलच्या दिघोरी/मो. ग्रामपंचायतमध्ये सुनीता साळवे यांना थेट जनतेने सरपंचपदासाठी निवडून दिले होते.तर इतर १२ जण ग्रामपंचायतीवर सदस्य म्हणून निवडून आले होते. एकंदरीत सरपंचासह १३ गावातील अधिकारी गेल्या वर्षभरापासून गावाचा कारभार बिनविरोध चालवत होते.गेल्या काही महिन्यांपासून सदस्यांची मान्यता न घेता स्वतःच्या मर्जीने कारभार करण्याचा आरोप करीत उपसरपंच व इतर सदस्यांनी याप्रकरणी नागपूर विभागाच्या अतिरिक्त आयुक्तांकडे तक्रार करून महिला सरपंचाला सदस्यपदावरून अपात्र ठरवावे,अशी मागणी केली होती.त्यांच्यावर विविध आरोप करण्यात आले.या आरोपांसह भंडारा जिल्हा परिषदेचे मुख्य कार्यकारी अधिकारी यांच्याकडून प्राप्त झालेल्या अहवालाच्या आधारे नागपूरच्या अतिरिक्त आयुक्तांनी महिला सरपंचाला नियमबाह्य काम करण्यासह कर्तव्यात कसूर केल्याप्रकरणी दोषी ठरविले.त्यानुसार अतिरिक्त आयुक्तांनी महिला सरपंचाविरुद्ध आदेश काढून त्यांना सदस्यपदासह सरपंचपदावरून अपात्र घोषित केले.विद्यमान महिला सरपंचाला अपात्र घोषित करण्यात आले आहे.या स्थितीत रिक्त असलेला पदभार विद्यमान उपसरपंच विजय खोब्रागडे यांच्याकडे सोपविण्यात आला आहे.