शेतशिवारातील परिसरात मृतावस्थेत आढळला बिबट्या..

चंद्रपूर :-जिल्ह्याच्या सावली वन परिक्षेत्राअंतर्गत येणाऱ्या टेकाडी गावनजीकच्या शेतशिवारातील परिसरात नऊ महिन्याच्या बिबट्याचा बछडा मृतावस्थेत आढळून आल्याने वन विभागात एकच खळबळ उडाली.विशेष म्हणजे,काही दिवसांपूर्वी याच परिसरातील पोल्ट्रीफॉर्मवर हल्ला करून १३५ कोंबड्यांना मारणाऱ्या एका मादी बिबट्याला त्याच ठिकाणी वनविभागाने जेरबंद केले होते.टेकाडी येथील सुनील गेडाम यांच्या शेतातील गट क्रमांक ३५३ मधील परिसरात एका झुडपात बिबट्या असल्याची माहिती वनविभागाला मिळाली.त्यानुसार अतिशिघ्र कृती दलाचे पथक व संजीवन पर्यावरण संस्थेचे सदस्य घटनास्थळी दाखल झाले.बिबट्याला बेशुद्ध करून सुरक्षितपणे पकडण्याची तयारी सुरू केली.मात्र,पाहणी करीत असतांना हा बिबट मृतावस्थेत असल्याचे निदर्शनास आले.त्यानुसार मृत बिबट्याला सावली वनपरिक्षेत्र कार्यालयात नेण्यात आले.पशुवैद्यकीय अधिकारी डॉ.कुंदन पोडचलवार यांनी शवविच्छेदन केले.बिबट्याचा शेतातील पिकांवरील कीटकनाशक फवारणीच्या विषबाधेने मृत्यू झाला असावा,अशी शक्यता वर्तविण्यात येत आहे.