मारहाण करून जोरदार धक्का; तरुणाचा मृत्यू..! -आरोपी अटकेत.

चंद्रपूर :-जिल्ह्याच्या कोरपना तालुक्यातील तुकडोजी नगर परिसरात काल,मंगळवार १२ ऑगस्ट रोजी सकाळच्या सुमारास एका तरुणाचा मृतदेह आढळून आल्याने परिसरात एकच खळबळ माजली होती. नागरिकांनी सदरची माहिती कोरपना पोलिसांना देताच पोलिसांनी घटनास्थळ गाठून मृतदेह ताब्यात घेत मृतदेहाची ओळख पटविली.आढळून आलेला मृतदेह हा कोरपना तालुक्याच्या तुळशी येथील २४ वर्षीय विश्वास नरेंद्र मालेकर या तरुणाचा असल्याचे स्पष्ट झाले.त्यानुसार पोलिसांनी तपासाची चक्रे गतीने फिरवून काही तासांतच आरोपीच्या मुसक्या आवळल्या.सुनील पवार वय २३ वर्षे,रा.पारधीगुडा, ता.कोरपना,जि.चंद्रपूर असे आरोपीचे नाव असून त्याच्यावर भारतीय न्याय संहितेच्या कलम १०३ अन्वये खुनाचा गुन्हा नोंदविण्यात आला आहे.आरोपी सुनील पवार याने जुन्या वैमनस्यातून झालेल्या वादात  विश्वास याला मारहाण केली.मारहाण करीत असतांनाच जोरदार धक्का दिल्याने विश्वासच्या डोक्याला गंभीर मार लागल्याने त्यात त्याचा मृत्यू झाला.या बाबत कुणालाही कळू नये,म्हणून आरोपीने घटनास्थळावरून पळ काढला.अश्यातच पोलिसांनी तपास यंत्रणा कामी लावून भांडाफोड केला.घटनेचा पुढील तपास तपास एसडीपीओ रवींद्र जाधव यांच्या मार्गदर्शनाखाली ठाणेदार सुनील गाडे यांच्या नेतृत्वात पीएसआय देवानंद केकन,पोलिस कर्मचारी साईनाथ जायभाये,प्रभाकर जाधव सह कोरपना पोलिस प्रशासन करीत आहे.