उद्रेक न्युज वृत्त
नवी दिल्ली :- राजधानी दिल्लीच्या विवेक विहार येथील एका बेबी केअर रुग्णालयात भीषण आग लागल्याची घटना घडली आहे.या घटनेत ७ नवजात बालकांचा दुर्दैवी मृत्यू झाला आहे.ही आग शनिवारी रात्री साडे ११ वाजताच्या जवळपास लागल्याची माहिती आहे.काही क्षणात आगीच्या ज्वाला बाहेरपर्यंत दिसू लागल्या.घटनास्थळी तात्काळ ९ अग्निशमन दलाच्या गाड्या पोहोचल्या,त्यांनी बेबी केअर रुग्णालयातील बाळांना सुखरुप बाहेर काढण्याचा प्रयत्न केला.अग्निशमन दलाच्या जवानांनी १२ बालकांना बाहेर काढले.पण, उपचारादरम्यान त्यापैकी ७ जणांचा मृत्यू झाला तर ५ जणांची प्रकृती गंभीर असल्याची माहिती आहे.त्यांना व्हेंटिलेटरवर ठेवण्यात आले आहे. ही आग का लागली याची सध्या काहीही माहिती नाही.
अग्निशमन दलाला रात्री ११.३० वाजता विवेक विहारच्या ब्लॉक बी,आयटीआयजवळील बेबी केअर सेंटरमध्ये आग लागल्याची माहिती मिळाली; त्यानंतर ९ गाड्यांना घटनास्थळी पाठवण्यात आले.बेबी केअर सेंटरच्या बाजुच्या इमारतीतही आग लागली पण सुदैवाने तिथे जिवीतहानी झाली नाही.बेबी केअर सेंटरमध्ये मोठ्या प्रमाणात ऑक्सिजन सिलेंडर असल्याचीही माहिती आहे.यापैकी काही ऑक्सिजन सिलेंडर फुटले देखील.५० मिनिटांनी या आगीवर नियंत्रण मिळवण्यात अग्निशमन दलाला यश आले.
