न्यायालयाने मुख्य आरोपीचा जामीन अर्ज फेटाळला.. -देसाईगंज शहरातील तरुणीचे अत्याचार प्रकरण..

देसाईगंज(गडचिरोली):-लग्नाचे खोटे आमिष दाखवून एका २३ वर्षीय तरुणीवर वारंवार अत्याचार केल्याचा प्रकार रविवार १७ ऑगस्ट २०२५ रोजी देसाईगंज शहरात उघडकीस आला होता.आपली फसवणूक झाल्याचे तरुणीच्या लक्षात येताच तिने संबंध तोडण्याचा प्रयत्न केला असता एका सहकाऱ्याच्या मदतीने तिच्यावर पाळत ठेवून दबाव टाकण्यात आला.प्रकरणी २३ वर्षीय तरुणीने वारंवार होणाऱ्या जाचाला कंटाळून १७ ऑगस्टला देसाईगंज पोलीस ठाणे गाठून देसाईगंज शहरातील नामांकित राधा ज्वेलर्सचे सराफा व्यापारी सुनिल बोके वय ४८ वर्षे,रा.गांधीवार्ड,देसाईगंज व अक्षय कुंदनवार वय ३२ वर्षे रा.मधुबन कॉलनी,देसाईगंज, जि.गडचिरोली यांच्या विरोधात तक्रार नोंदविली होती. त्यानुसार १७ ऑगस्टला दोघांनाही अटक झाली होती. न्यायालयाने त्यांना १९ ऑगस्ट पर्यंत पोलीस कोठडी सुनावली होती व नंतर दोघांचीही कारागृहात रवानगी करण्यात आली होती.त्यानुसार दोघांनीही गडचिरोली जिल्हा सत्र न्यायालयात जामीन अर्ज दाखल केला होता. जामीन अर्जावर काल,शुक्रवार १२ सप्टेंबर रोजी सत्र न्यायालयात सुनावणी होत वकिलांनी युक्तिवाद केला. त्यानुसार सहआरोपी अक्षय कुंदनवार याची जामिनावर सुटका करण्यात आली.तर प्रकरणातील मुख्य आरोपी याचेवर गंभीर स्वरूपाचे आरोप असल्याने जामीन दिल्यास आरोपी तक्रारदारास धमकावून दबाव निर्माण करू शकतात,त्यामुळे प्रकरणात महिलेला संरक्षण देणे आवश्यक आहे,असा युक्तिवाद सरकारी वकिलांनी केला.प्रकरणी सरकारी वकिलांनी केलेला युक्तिवाद ग्राह्य धरत गडचिरोली जिल्हा सत्र न्यायालयाने प्रकरणातील मुख्य आरोपी सुनील बोकेचा जामीन अर्ज फेटाळून लावला.