देसाईगंजचे माजी नगराध्यक्ष जेसा मोटवानी यांना काँग्रेसचा दणका; पक्षामधून निलंबित..!

देसाईगंज(गडचिरोली):-उमेदवारी अर्ज दाखल करण्यास सुरुवात होण्याच्या तीन दिवस अगोदर म्हणजेच शुक्रवार ७ नोव्हेंबरला देसाईगंज नगर परिषद क्षेत्रातील राजकारणात मोठी उलथापालथ झाली.विशेष म्हणजे,त्याच दिवशी पक्ष प्रवेश अन् त्याच दिवशी नगराध्यक्ष पदाची उमेदवारी घोषित करण्यात आल्याने सर्वजण अवाक् झाले होते.७ नोव्हेंबरला सामाजिक कार्यकर्त्या निता संजय गुरु,देसाईगंजचे माजी नगराध्यक्ष जेसा मोटवानी तसेच जेष्ठ अधिवक्ता संजय गुरु यांनी राज्याचे उपमुख्यमंत्री अजित पवार,प्रफुल पटेल,इंद्रनील मनोहरराव नाईक,राज्य महिला आयोगाच्या अध्यक्षा रुपाली चाकणकर,सुनील तटकरे व विविध मान्यवरांच्या उपस्थितीत अजित पवार गटाच्या राष्ट्रवादी काँग्रेस पक्षामध्ये पक्ष प्रवेश केला होता.त्याच वेळेस अजित पवार गटाकडून देसाईगंज नगराध्यक्षपदाच्या उमेदवारीचीही घोषणा करण्यात आली.यात सामाजिक कार्यकर्त्या निता संजय गुरु यांना देसाईगंज नगराध्यक्ष पदाची उमेदवारी घोषित करण्यात आली.यामुळे ऐन नगर परिषद निवडणुकीच्या तोंडावर काँग्रेस पक्षाला मोठा धक्का बसला.देसाईगंजचे माजी नगराध्यक्ष जेसा मोटवानी आणि जेष्ठ अधिवक्ता संजय गुरु हे काँग्रेस पक्षाचे निष्ठावंत तसेच ज्येष्ठ नेते म्हणून प्रख्यात होते.

अश्यातच ऐन देसाईगंज नगर परिषद निवडणुकीचे उमेदवारी अर्ज दाखल करण्यास काही दिवस उरलेले असतांनाच काँग्रेस पक्षाला रामराम ठोकून अजित पवार गटाच्या राष्ट्रवादी काँग्रेस पक्षात एंट्री केल्याने विविध राजकीय चर्चांना उधाण आले होते.त्यातच,आता ऐन स्थानिक स्वराज्य संस्थांच्या निवडणुकीच्या तोंडावर पक्षाचा ‘हात’ सोडणाऱ्यांना काँग्रेसने दणका दिला आहे. देसाईगंजचे माजी नगराध्यक्ष जेसा मोटवानी यांच्यावर कारवाई करण्यात आली आहे. काल,बुधवार १९ नोव्हेंबर रोजी प्रांताध्यक्ष हर्षवर्धन सपकाळ यांच्या आदेशावरुन वरिष्ठ उपाध्यक्ष ॲड.गणेश पाटील यांनी पक्षविरोधी भूमिका घेतल्याने त्यांना ६ वर्षांसाठी निलंबित करण्याचा आदेश जारी केला आहे.