दुर्दैवी घटना; अस्वलाच्या हल्ल्यात गुराख्याचा मृत्यू..

भंडारा :-जंगल परिसरात गुरे चराईसाठी गेलेल्या गुराख्यावर अचानकपणे हल्ला चढवून गंभीर जखमी केल्याची घटना काल सोमवारी भंडारा जिल्ह्याच्या साकोली तालुक्यातील वन विभागाच्या सानगडी(पूर्व) उपवन क्षेत्रातील पापडा बिटात घडली होती.अस्वलाच्या हल्ल्यात दौलत मणिराम राऊत वय ५५ वर्षे,रा.सोनका (पळसगाव),ता.साकोली,जि.भंडारा हे गंभीर जखमी झाल्याने प्रथमोपचारानंतर त्यांना नागपूरच्या मेडिकल रुग्णालयात दाखल करण्यात आले.मात्र,मोठ्या प्रमाणात रक्तस्राव झाल्याने उपचारादरम्यान मृत्यू झाला.

दौलत राऊत हे गुरे चारण्यासाठी जंगल परिसरात गेले असता दुपारच्या सुमारास दबा धरून बसलेल्या अस्वलाने अचानक हल्ला चढविला.परिसरात असलेल्या ग्रामस्थांनी घटनास्थळी धाव घेत अस्वलाला हुसकावून लावले.घटनेची माहिती मिळताच वनविभागाचे वनपरीक्षेत्र अधिकारी सचिन कटरे,वन क्षेत्र सहाय्यक गुरबेले,खंडागळे,वनरक्षक आशिष तूरकर, एस.एन.मेश्राम,गजभिये पथकासह घटनास्थळी दाखल झाले.पंचनामा करून घटनेचा आढावा घेऊन हल्ल्यातील जखमी दौलत राऊत यांना तात्काळ साकोली उपजिल्हा रुग्णालयात दाखल करण्यात आले.तिथे प्राथमिक उपचारानंतर त्यांना भंडारा जिल्हा रुग्णालयात हलविण्यात आले.प्रकृती गंभीर असल्याने पुढील उपचारासाठी नागपूर मेडिकलमध्ये हलविण्यात आले. मात्र,उपचारादरम्यान त्यांचा मृत्यू झाला.घटनेने परिसरात हळहळ व्यक्त केली जात आहे.