तीन वर्षीय चिमुकल्यावर काळाचा घाला; ई-रिक्षात बसून खेळत असतांना रिक्षा उलटला..

नागपूर :-घराचे बांधकामाकरिता साहित्य घेऊन आलेल्या ई-रिक्षाने क्षणात हसत्या-खेळत्या परिवारावर मोठा आघात करून सोडला आहे.तीन वर्षीय चिमुकला ई-रिक्षात बसून खेळत असतांना अचानकपणे ई-रिक्षा चालू होऊन काही अंतरावर गेला आणि उलटला.यात चिमुकल्याचा डोक्याला गंभीर मार लागून मृत्यू झाल्याची दुर्दैवी घटना नागपूरच्या वाठोडा पोलिस ठाण्याच्या हद्दीतील बिडगाव येथील आराधना नगरात शुक्रवारी दुपारच्या सुमारास घडली.

दिव्यांश सुनील लिल्लारे वय ३ वर्षे असे मृत चिमुकल्याचे नाव आहे.दिव्यांशचे वडील सुनील कारुलाल लिल्लारे यांच्या शेजारीच त्यांची बहीण राहते.बहिणीच्या घराचे बांधकाम सुरु असल्याने सुनील यांनी शुक्रवारी दुपारी ई-रिक्षामध्ये सिमेंटचे चौकट आणले होते.सिमेंटचे चौकट काढत असतांना त्यांचा तीन वर्षाचा चिमुकला दिव्यांश हा ई-रिक्षात बसून खेळत होता.खेळत असतांना अचानक ई-रिक्षा सुरु होऊन काही अंतरावर जाऊन बाजूला उलटला.यात दिव्यांशच्या डोक्याला गंभीर दुखापत झाली.त्याला उपचारासाठी खासगी रुग्णालयात नेले असता डॉक्टरांनी तपासून मृत घोषित केले. याप्रकरणी वाठोडा पोलिस ठाण्याचे पीएसआय सागर गायकवाड यांनी अकस्मात मृत्यूची नोंद करून पुढील तपास सुरु केला आहे.तीन वर्षीय चिमुकल्याच्या जाण्याने लिल्लारे कुटुंबियांना तीव्र मानसिक धक्का बसून सर्वत्र हळहळ व्यक्त केली जात आहे.कुटुंबात आई,वडील व आठ वर्षाचा मोठा भाऊ आहे.