जीर्ण इमारतीचा भाग अचानक कोसळला; महिला गंभीर जखमी..!

चंद्रपूर :-एका जीर्ण इमारतीचा भाग अचानकपणे कोसळल्याने चंद्रपूर शहरात एकच खळबळ माजली. इमारतीच्या खाली सकाळच्या सुमारास काही दूध विक्रेते दुधाची विक्री करीत होते.त्याचवेळेस घटना घडल्याने इमारतीचा मलबा अंगावर पडून दूध विक्री करणारी एक महिला गंभीर जखमी झाली.सदरची घटना चंद्रपूर शहराच्या जटपुरा गेट परिसरात आज, गुरुवार ११ सप्टेंबर रोजी सकाळच्या सुमारास घडली.

चंद्रपूर शहरातील जटपूरा गेट नजिकच्या परिसरात उत्तम नामक लॉज आहे.सदरच्या लॉजचे बांधकाम कितीतरी वर्षे जुने आहे.त्यातच मागील काही दिवसांपासून जिल्ह्यात जोरदार पाऊस बरसत आहे.अश्यातच आज गुरुवारी सकाळच्या सुमारास जीर्ण अवस्थेत असलेल्या उत्तम लॉजच्या इमारतीचा एक भाग अचानकपणे कोसळला.कोसळलेल्या भागाखाली दूध विक्री करणारे इतर नागरिक थोडक्यात बचावले.मात्र,यात ४५ वर्षीय मनीषा लोखंडे ह्या गंभीर जखमी झाल्या.मनीषा लोखंडे या दररोज सकाळच्या सुमारास उत्तम लॉजच्या इमारतीच्या खाली बसून दूध विक्रीचे काम करतात. घटना घडताच परिसरातील नागरिकांनी घटनास्थळी धाव घेत जखमी महिलेस शासकीय रुग्णालयात उपचारासाठी दाखल केले.सुदैवाने मोठी दुर्घटना टळली असली तरी शहरात अश्या धोकादायक इमारती किती? याकडे महानगर पालिकेने लक्ष देणे गरजेचे असून अश्यांवर तात्काळ कारवाईची मागणी जोर धरू लागली आहे.