आज सकाळीच दाट वस्तीत बिबट्याची एंट्री; चार जण जखमी..

नागपुर :-नागपूरच्या पारडी परिसरातील दाट लोकवस्तीमध्ये बिबट शिरल्यामुळे मोठी खळबळ माजली.बिबट्याला एक तासाच्या रेस्क्यू ऑपरेशनंतर पकडण्यात आले आहे.आज बुधवारच्या सकाळी साडेपाच ते सहा वाजताच्या दरम्यान बिबट्याने या परिसरातील चार जणांना जखमी केले होते.त्यांना तातडीने रुग्णालयात दाखल करण्यात आले आहे आणि त्यांच्यावर उपचार सुरू आहेत.या घटनेमुळे परिसरात काहीकाळ तणावाचे वातावरण निर्माण झाले.कोणताही अनुचित प्रकार टाळण्यासाठी पोलिसांचा बंदोबस्त तैनात करण्यात आला.पोलिसांनी बिबट लपून बसलेल्या घराच्या अवतीभवती कडक पहारा ठेवला होता.लागलीच वन विभागाच्या कर्मचाऱ्यांनी बिबट्याच्या शरीरावर दोन डॉर्ट मारले.हे डार्ट लागल्यानंतर गुंगीचे औषध बिबट्याच्या शरीरात भिनायला लागले.मात्र, त्याअवस्थेतही बिबट्याने १५ फूट उंच उडी मारली आणि दुसऱ्या गच्चीत जाण्याचा प्रयत्न केला.शरीरात औषध लागताच बिबट्या खाली कोसळला आणि वनविभागाच्या कर्मचाऱ्यांनी त्याला जेरबंद केले.तत्पूर्वी बिबट्याने बराच वेळ धुमाकूळ घातला होता.दोन दिवसांपूर्वीही एका बिबट्याने नागपूरच्या कापसी भागात एंट्री केली होती.