अवैध रेती तस्करी; पाच आरोपी अटकेत.. – जेसीबी,टिप्परसह ट्रॅक्टर जप्त..

भंडारा :-जिल्ह्यात अवैध रेती तस्करीने चांगलाच उच्छाद मांडला आहे.येथील काही एसडीओ,तहसीलदार व इतर कर्मचाऱ्यांवर कारवाया होऊनही बेइज्जत होण्याचे प्रमाण वाढलेले दिसून येत आहे.स्थानिक पातळीवरील अधिकारी,कर्मचारी अंगाला हळद लावून घेत नसल्याने चक्क जिल्हा प्रशासनास अवैध रेती उत्खनन व वाहतूक प्रकरणी कारवाई करावी लागत असल्याचा प्रकार भंडारा जिल्ह्याच्या लाखांदूर तालुक्यात उघडकीस आला आहे.जिल्हाधिकाऱ्यांच्या विशेष पथकाने लाखांदूर तालुक्यातील साखरा घाट परिसरात मध्यरात्री धाड टाकून अवैध रेती तस्करी करणारी १ जेसीबी,दोन टिप्पर आणि एक ट्रॅक्टरसह सुमारे ७८ लाख ८६ हजार रुपयांचा मुद्देमाल जप्त केला आहे.लाखांदूरचे नायब तहसीलदार दत्ता धकाते यांच्या फिर्यादीवरून,दिघोरी पोलिसांनी ५ आरोपींना अटक केली असून त्यांच्याकडून ३० लाखांचा टिप्पर,१२ लाखांचा मिनी टिप्पर,६.५ लाखांचा ट्रॅक्टर आणि ३० लाखांची जेसीबी असा एकूण ७८.८६ लाखांचा मुद्देमाल जप्त केला आहे.दिघोरी पोलिसांनी या प्रकरणी चेतन शामराव देशमुख,सतीश शंकर आगासे, कमलेश शामराव बावनकुळे,शंकर वामन मटे आणि राकेश धनु साळवे सर्व रा.दिघोरी यांच्यावर भारतीय न्याय संहिता कलम ३०३(२),३(५)व महाराष्ट्र जमीन महसूल अधिनियमान्वये गुन्हा नोंदवला आहे.पुढील तपास दिघोरी पोलीस ठाण्याचे पोलीस हवादार विलास मातेरे करीत आहेत. कारवाईमुळे रेती तस्करांचे धाबे दणाणले आहेत.