अल्पवयीन मुलीच्या विनयभंग प्रकरणी पोलीस पाटलास अटक..

चंद्रपूर :-सिंदेवाही तालुक्यातील देवाडा येथील पोलिस पाटलाने एका अल्पवयीन मुलीसोबत बळजबरीने विनयभंग करण्याचा प्रयत्न केल्याची घटना रविवारी घडली.अल्पवयीन मुलीने आपल्या वडिलासह पोलिस स्टेशन गाठत तक्रार दिली असून, यातील आरोपी पोलिसांच्या ताब्यात आहे.मुकेश काशीनाथ पेटकुले वय २८ वर्षे रा.देवाडा,ता.सिंदेवाही असे आरोपी पोलिस पाटलाचे नाव आहे.

पोलिसांनी दिलेल्या माहितीनुसार रविवारी ५ जानेवारीला अल्पवयीन मुलगी शाळेचा कार्यक्रम असल्याने गावातील तीची वर्ग मैत्रीण मिळून सकाळी कार्यक्रमाला हजर झाले होते.दुपारी ३ वाजताच्या दरम्यान शाळेचा कार्यक्रम संपन्न झाल्याने दोघेही सिंदेवाही येथून बसने देवाडाकरिता निघाले.देवाडा गावच्या बसस्थानकावर उतरल्यानंतर काही वेळात मुलींना गावातील पोलिस पाटिल मुकेश पेटकुले आपल्या दुचाकीने आल्याचे दिसले.बस स्थानकापासुन गाव काही अंतरावर असल्याने मुलींनी पोलिस पाटील पेटकुले यांच्यावर विश्वास ठेऊन गावात सोडून द्यावे; अशी विनंती केली.पेटकुले यांनी सोडून देतो म्हणून दोन्ही मुलींना आपल्या दुचाकीवर बसवले.फिर्यादी मुलीला सिंदेवाहीला घेवून जातो आणि तिच्या वर्ग मैत्रीणींना बसस्थानकावर ठेवतो बोलू लागल्याने फिर्यादी मुलीने येण्यास नकार दिला.तरीसुद्धा आरोपी पेटकुले आग्रह करीत होता.काही अंतरावर दोन्ही मुलींनी पेटकुले यांना दुचाकी थांबविण्यास सांगितले आणि दोन्ही मुली दुचाकीवरुन उतरून पायी-पायी गावाच्या दिशेने निघाल्या.आरोपीने आपली दुचाकी पुन्हा मुलींजवळ आणून मुलींना दुचाकीवर बसविले आणि दुचाकी सिंदेवाहीच्या दिशेने फिरविली.त्यावर फिर्यादी मुलीने चालत्या दुचाकीवर प्रतिकार करुन आपल्या वडीलांना फोन करून देवाडाच्या बसस्थानकावर येण्यास सांगितले.त्यावर आरोपीने घरी फोन नको करू असे बोलला आणि मोबाइल आपल्याजवळ ठेवून घेतला. त्यानंतर फिर्यादी मुलीची ओढनी ओळून केस पकडले, व घरी कोणाला फोन नको करू तुझ्या वडिलांचा माझ्यावर विश्वास आहे,ते तुझ्यावर विश्वास करणार नाही,असे म्हणून वर्ग मैत्रीनी समोर फिर्यादी मुलीसोबत बळजबरी करून विनयभंग करण्याचा प्रयत्न करू लागला.तितक्यात फिर्यादी मुलीचे वडील त्याठिकाणी आले आणि घडलेला सर्व प्रकार मुलीने आपल्या वडिलांना सांगितला.यावरून अल्पवयीन मुलगी,तिचे वडील व वर्ग मैत्रीण मिळून सिंदेवाही पोलिस स्टेशन गाठले आणि पोलिस पाटिल मुकेश पेटकुले याच्या विरुद्ध तक्रार दाखल केली.

तक्रार दाखल होताच सिंदेवाही पोलिसांनी आरोपी मुकेश काशिनाथ पेटकुले याला अटक करुन ताब्यात घेतले. पुढील तपास ब्रम्हपुरीचे उपविभागीय पोलिस अधिकारी दिनकर ठोसरे आणि सिंदेवाहीचे पोलिस निरीक्षक विजय राठोड यांच्या मार्गदर्शनात पोलिस उपनिरीक्षक राधिका गायकवाड करीत आहेत.