आता वाहनधारकांनी हाय सिक्युरिटी रजिस्ट्रेशन नंबर प्लेट लावणे आवश्यकच; अन्यथा कारवाई…

उद्रेक न्युज वृत्त :-वाहनांच्या नंबर प्लेटमध्ये छेडछाड व बनावटगिरी करून होणारे गुन्हे कमी करणे, रस्त्यावर धावणाऱ्या वाहनांची ओळख पटविणे तसेच राष्ट्रीय सुरक्षेच्या दृष्टिकोनातुन सर्व वाहनांना एचएसआरपी बसविणे आवश्यक असून,सर्वोच्च न्यायालयाने तसे निर्देशही दिलेले आहेत.याअन्वये राज्यातील सर्व वाहन धारकांना त्यांच्या वाहनांना एचएसआरपी नंबर प्लेट बसविण्याकरिता सुचना जारी करण्यात आल्या आहेत.१ एप्रिल २०१९ पासून उत्पादित होणाऱ्या सर्व नवीन वाहनांना केंद्रीय मोटार वाहन नियम,१९८९ च्या नियम ५० नुसार वाहनास हाय सिक्युरिटी रजिस्ट्रेशन नंबर प्लेट बसविण्याची तरतुद करण्यात आलेली आहे.यासाठी प्रत्येक जिल्ह्याकरिता वेगवेगळ्या एजन्सी नियुक्त करण्यात येणार आहेत.त्यासाठी काही जिल्ह्यात पोर्टलही निश्चित करण्यात आलेले आहे.वाहनधारकांनी पोर्टल बुकिंग करून त्यांच्या सोईप्रमाणे अपॉईंटमेंट घेऊन एचएसआरपी नंबर प्लेट बनवून घ्यावे लागणार आहे.वाहनधारक त्या जिल्ह्याच्या कार्यालयातील नोंदणीधारक नसला तरी काही कामानिमित्त संबंधित जिल्ह्यात वाहन वापरत असेल तरी देखील सदर वाहनास नंबर प्लेट बसविणे आवश्यक आहे.एचएसआरपी नंबर प्लेट बसविण्याकरीता दुचाकी,ट्रॅक्टर करीता ४५० रुपये, तीन चाकी वाहनाकरीता ५०० रुपये आणि इतर सर्व वाहने ७४५ रुपये आकारण्यात येणार आहे.

वाहनधारकांना त्याच्या वाहनांवर एचएसआरपी नंबर प्लेट बसविण्यासंदर्भात काही तक्रार असल्यास, संबंधित सेवापुरवठा धारकांच्या पोर्टलवर तसेच प्रादेशिक परिवहन कार्यालय येथे तक्रार दाखल करू शकतात.वाहनांवर एचएसआरपी नंबर प्लेट न बसविल्यास वाहनाचे मालकी हस्तांतरण,पत्ता बदल, वित्त योजना चढविणे,उतरविणे,दुय्यमप्रत,विमा अद्ययावत करणे इत्यादी कामकाज थांबविण्यात येणार आहे.तसेच एचएसआरपी नंबर प्लेट नसलेली वाहने, बनावट एचएसआरपी नंबर प्लेट असलेली वाहने, आदी वाहनांवर भविष्यात दंडात्मक कारवाई करण्यात येणार आहे.