उद्रेक न्युज वृत्त
चिमूर(चंद्रपूर) :- चिमूर पासूनआठ किलोमिटर अंतरावरील भिसी-चिमूर राष्ट्रीय महामार्गावरील येरखेडा गावातील सरपंच संजय गेडाम व ग्रामपंचायत ऑपेरेटर मितेश डांगे हे काल शनिवारी सकाळी ९ वाजताच्या सुमारास ग्रामपंचायत कार्यालयात काम करीत असतांना येरखेडा ग्रामपंचायतचे सदस्य सुधाकर नन्नावरे तेथे आले.त्यांनी ग्रामपंचायत कार्यालयाच्या दाराला कुलूप लावून सरपंच व ग्रामपंचायत ऑपरेटरला आत कोंडले.माजी जिल्हा परिषद सदस्य विलास डांगे यांचे सुद्धा गावा जवळच हॉटेल असून ते ब्लिचिंग पावडर मागायला येरखेडा ग्रामपंचायतला गेले असता ग्रामपंचायतला बाहेरून कुलूप लावलेला अन् बाहेर ग्रामपंचायत चपरासी बसलेले होते.याबाबत विलास डांगे यांनी सविस्तर माहिती घेतली असता सरपंचांना आतमध्ये कोंडून ठेवले असल्याची माहिती मिळताच त्यांनी तसेच गावातील काही नागरिकांनी भिसी पोलिस स्टेशनला फोनकरून घटनेची माहिती दिली. सदर घटनेची माहिती भिसी पोलिसांना कळताच भिसी पोलिस स्टेशनचे पोलिस उपनिरीक्षक सचिन जंगम येरखेडा ग्रामपंचायत कार्यालयात आले व माजी जिल्हा परिषद सदस्य विलास डांगे यांच्या समोर पहारीने कुलूप तोडून ग्रामपंचायत सरपंच व ऑपरेटरला बाहेर काढले.सरपंच गेडाम यांच्या फिर्यादीवरून ग्रामपंचायत सदस्य सुधाकर नन्नावरे यांच्या विरोधात भिसी पोलिसात भादंविचे कलम ३४२,१८६ नुसार गुन्हा दाखल करण्यात आला.पुढील तपास ठाणेदार प्रकाश राऊत यांच्या मार्गदर्शनाखाली भिसी पोलिस करीत आहेत.
