उद्रेक न्युज वृत्त
चंद्रपूर :- चोर कितीही चोऱ्या करणार परंतु एक ना एक दिवस त्याचा भांडाफोड होणार असे म्हणणे चुकीचे ठरणार नाही.आई-वडील दिवस रात्र काबाडकष्ट करीत मुलांना शिकवितात.मात्र काही मुले शिक्षणासहित चुकीच्या वळणावर जातात; असाच एक उच्च शिक्षित तरुण स्थानिक गुन्हे शाखेच्या जाळ्यात अडकला आहे. दुचाकी चोरी प्रकरणात एमबीए अंतिम वर्षाचे शिक्षण घेणाऱ्या उच्च शिक्षित तरुणाला अटक करण्यात आली आहे.आशिष रहांगडाले वय २५ वर्षे रा.अष्टभुजा चंद्रपूर,असे आरोपीचे नाव आहे. आरोपीकडून स्थानिक गुन्हे शाखेच्या पथकाने चार दुचाकी वाहन जप्त केले आहे.
जिल्ह्यात दुचाकी चोरीच्या घटना वाढत असल्याने पोलिस अधीक्षक मुमक्का सुदर्शन यांनी याबाबत स्थानिक गुन्हे शाखेला कारवाई बाबत निर्देश दिले. पोलिस निरीक्षक महेश कोंडावार यांनी पथक तयार करीत तपास सुरू केला,दरम्यान एका पोलिस कर्मचाऱ्यांची दुचाकी चोरी झाली होती.स्थानिक गुन्हे शाखेच्या पथकाला गोपनीय माहिती मिळाली की जिल्हा क्रीडा संकुल चंद्रपूर येथे २५ वर्षीय तरुण विना कागदपत्रांची दुचाकी वाहन विक्री करण्यासाठी आला आहे.स्थानिक गुन्हे शाखेच्या पथकाने त्या तरुणाला ताब्यात घेत विचारपूस केली असता सदर दुचाकी वाहन हे चोरी केले असल्याची त्याने कबुली दिली.दरम्यान आरोपी आशिष रहांगडाले २५ हा नागपुरातील एका महाविद्यालयात अंतिम वर्षाचे शिक्षण घेत आहे.ही कारवाई एलसीबीचे पोलिस निरीक्षक महेश कोंडावार, पोलिस उपनिरीक्षक विनोद भुरले, पोलिस कर्मचारी संजय आतकुलवार, नागेश येलपुलवार आणि नितीन रायपुरे यांनी केली.
