३८ वर्षीय एसटी कर्मचाऱ्याची गळफास घेऊन आत्महत्या..

चंद्रपूर :-एका तरुण एसटी बस कर्मचाऱ्याने झाडाला गळफास घेऊन आत्महत्या केल्याची घटना आज, शनिवार १७ जानेवारी रोजी सकाळच्या सुमारास चिमूर बसस्थानक परिसरात उघडकीस आली.सुधीर माणिक भिलकर वय ३८ वर्षे असे आत्महत्या केलेल्या कर्मचाऱ्याचे नाव असून भिलकर हे चिमूर बस आगारात कार्यरत होते.

आज शनिवारी सकाळच्या सुमारास चंद्रपूर जिल्ह्याच्या वरोरा वरून शालेय विद्यार्थ्यांनी भरलेली बस चिमूरकडे आली.सदरची बस ही बसस्थानक परिसरात येताच बसमधील काही विद्यार्थ्यांनी  खिडकीतून पाहिले असता एका झाडावर लटकलेल्या अवस्थेत मृतदेह दिसून आला.विद्यार्थ्यांनी घटनेची माहिती एसटी कर्मचाऱ्यांना दिली.कर्मचाऱ्यांनी तात्काळ चिमूर पोलिसांना पाचारण केले.ठाणेदार दिनेश लबडे पोलीस पथकासह घटनास्थळी दाखल झाले.पोलिसांनी घटनेचा पंचनामा करून मृतदेह शवविच्छेदनासाठी चिमूर उपजिल्हा रुग्णालयात पाठवला.घटनेने परिसरात शोककळा पसरली असून आत्महत्येचे कारण अद्याप गुलदस्त्यात आहे.