स्वतःच्या दुकानातून ग्रामपंचायतीला साहित्य पुरवठा; गमावला सरपंच पद..

भंडारा :-स्थानिक स्वराज्य संस्थांची निवडणूक लढवण्यापूर्वी ‘मी ग्रामपंचायतीचा ठेकेदार नाही’ वा ‘ग्रामपंचायतीकडून कुठल्याही प्रकारचा कंत्राट,आर्थिक लाभ घेणार नाही’ असे लेखी हमीपत्र नामनिर्देशन अर्ज सादर करतांना द्यावे लागते.अश्यातही अनेकजण ग्रामपंचायतीकडून लाभ वा आपल्या फायद्यासाठी पदाचा दुरूपयोग करतांना दिसून येतात.मात्र,एखाद्या चेल्याला गुरू भेटला तर मालकाची जिरवल्याशिवाय राहत नाही.पण,याठिकाणी ना चेला,ना मालक केवळ पुराव्यानिशी तक्रारच महत्वाची ठरली आहे.स्वतःच्या मालकीच्या दुकानातून ग्रामपंचायतीला बांधकाम साहित्य पुरवठा करून कंत्राटाच्या माध्यमातून आर्थिक लाभ मिळवल्याप्रकरणी पवनी तालुक्याच्या अड्याळ ग्रामपंचायतीचे सरपंच शिवशंकर मुंगाटे यांना महाराष्ट्र ग्रामपंचायत अधिनियम १९५८ चे कलम १४ (ग) मधील तरतुदींचे उल्लंघन केल्याचा ठपका ठेवत भंडारा जिल्ह्याचे जिल्हाधिकारी सावन कुमार यांनी सरपंच आणि सदस्य पदावरून अपात्र घोषित केले आहे.

अड्याळ ग्रामपंचायतीचे सरपंच शिवशंकर मुंगाटे यांच्या मालकीची ‘प्रनिश ट्रेडर्स’ नामक दुकान आहे.त्यामुळे, आपलीच ग्रामपंचायत व आपलीच दुकान असल्याने ग्रामपंचायतीला बांधकाम साहित्य व इतर साहित्य पुरवण्याचे काम करण्यात येत होते.याबाबत चिंतामण शेषराव वाघमारे यांनी पुराव्यासह तक्रार दाखल केली होती.त्यानुसार,सरपंच या जबाबदार पदावर असतांना मुंगाटे यांनी आपल्या अधिकारांचा गैरवापर करून कंत्राटी कामातून आर्थिक नफा मिळवल्याचे तपासात निष्पन्न झाले.सरपंच पदावर निवडून येण्यापूर्वी आणि त्यानंतरही त्यांनी या कंत्राटांच्या माध्यमातून आर्थिक लाभ मिळवला होता.त्यातच,निवडणूक प्रतिज्ञापत्रात वस्तुस्थिती लपवून शासनाची दिशाभूल केली.सरपंच पदाचा कार्यभार स्वीकारल्यानंतरही मुंगाटे यांनी आपल्या पदाचा प्रभाव वापरून प्रनिश ट्रेडर्सची विविध देयके बेकायदेशीरपणे उचलल्याचे सिद्ध झाल्याने मुंगाटे यांना पदावरून पायउतार व्हावे लागले आहे.