समोरून येणाऱ्या दुचाकीला बोलेरो वाहनाची जबर धडक; चौघांचा दुर्दैवी मृत्यू…

भंडारा :-जिल्ह्याच्या तुमसर तालुक्यातील पाथरी गावानजिक रामनगरजवळ सोमवारच्या रात्री अकरा वाजताच्या सुमारास समोरून येणाऱ्या दुचाकीला बोलेरो वाहनाने जबर धडक दिल्याने दुचाकीवरील तिघांचा जागीच दुर्दैवी मृत्यू झाला तर गंभीर जखमी महिलेचा उपचारादरम्यान मृत्यू झाला आहे. मृतकांमध्ये एका पाच वर्षीय चिमुकलीचा समावेश आहे.कैलाश मरकाम वय ४२ वर्षे,पारबता मरकाम वय ३६ वर्षे,व दुर्गा कंगाली वय ३० वर्षे तर ५ वर्षीय चिमुकली यामिनी कंगाली अशी मृतकांची नावे आहेत.

माहितीनुसार,चौघेही लग्न समारंभाकरिता दुचाकीने मध्यप्रदेशातील बोनकट्टा येथे गेले होते.लग्न आटोपून रात्रीच्या सुमारास दुचाकीने त्यांचे स्वगाव चिखला (माईन) येथे परत येत होते.अशातच कैलाश मरकाम त्याची पत्नी पारबता कैलाश मरकाम,शेजारी राहणाऱ्या सुषमा दुर्गाप्रसाद कंगाली आणि तिची पाच वर्षाची मुलगी यामीनी दुर्गाप्रसाद कंगाली हे चौघे परत येत असतांना वरातीचे बोलेरो वाहन चालकाने पूर्वीच नाकाडोंगरी जवळील चांदमारा लोभीजवळ एका इसमास धडक दिली होती.त्यामुळे बोलेरो वाहन चालक दिनेश गौपाले मध्यप्रदेशकडे सुसाट वेगाने जात होता.अशातच दुचाकीवर असलेल्या चौघांना जबर धडक दिल्याने चौघांचाही दुर्दैवी मृत्यू झाला.प्रकरणी गोबरवाही पोलिसांनी चालकाच्या विरोधात गुन्हा दाखल केला आहे.