शासकीय जागेवरील अतिक्रमण भोवला; देसाईगंज तालुक्यातील सावंगीच्या थेट सरपंच अपात्र..

मौजा-सावंगी येथील ग्रामपंचायत सार्वत्रीक निवडणूक माहे ऑक्टोंबर-२०२२ ला पार पडली.सदर निवडणूकीमध्ये प्रभा मनोज ढोरे ह्या सरपंच पदावर

थेट जनतेमधून निवडून आल्या.परंतु,त्यांचे राहते घर सर्व्हे नंबर ३३४ हे वनविभागाच्या जागेवर आहे.सदर घराच्या जागेचा अद्यापही निवासाकरीता पट्टा मिळालेला नाही. वन विभागाचे जागेवर त्यांचे सासरे रुषी मंगरु ढोरे यांनी अतिक्रमण केलेले आहे आणि त्याच जागेवर सरपंच आपल्या परीवारासोबत वास्तव्यास आहेत.अश्यातच काही महिन्यांपूर्वी घराला लागून पुन्हा नविन बांधकाम केले हे नविन बांधकाम सुध्दा वनविभागाच्या सर्व्हे नंबर ३३४ मध्ये आहे आणि सदर बांधकामाची कोणतीही पूर्व परवानगी तहसिल कार्यालयाकडून किंवा ग्रामपंचायत कडून घेतलेली नाही,अशी तक्रार सावंगी येथील देवचंद पांडूरंग मेश्राम यांनी ११ डिसेंबर,२०२५ रोजी गडचिरोली जिल्हाधिकाऱ्यांकडे केली होती.त्यानुसार,देसाईगंज तहसिलदार यांचेकडून मौका चौकशी अहवाल मागविण्यात आला.चौकशीत शासकीय जागेवर अतिक्रमण केल्याचे सिद्ध झाले.त्यानंतर,प्रभा ढोरे यांनी गडचिरोली येथील प्रत्यक्ष सुनावणीत कोणतेही स्पष्टीकरण अथवा विवादीत जमिनीचा दावा करणारे किंवा मालकी हक्क दर्शविणारे कोणतेही सबळ पुरावे प्रकरणात सादर केलेले नाही किंवा लेखी उत्तर सादर करण्यास संधी देऊनही दाखल केले नाही.प्रकरणी प्रभा मनोज ढोरे,सरपंच,ग्रामपंचायत सावंगी यांचे सार्वजनिक मालमत्तेवर अतिक्रमण असल्याचे प्रथमदर्शनी सिद्ध झाल्याने त्यांना अपात्र ठरविण्यात आले आहे.