देसाईगंज पोलिसांची धडक कारवाई; दारु तस्कराच्या आवळल्या मुसक्या.. – सहा लाख रुपयांचा मुद्देमाल जप्त..

देसाईगंज(गडचिरोली):-देसाईगंज तालुक्यातील दारु विक्रिवर प्रतिबंध लावण्यासाठी देसाईगंज पोलिसांनी धडक मोहिम हाती घेतली असुन एका दारु तस्कराच्या मुसक्या आवळण्यात पोलिसांना यश आले आहे. देसाईगंज पोलीस ठाण्याचे सहाय्यक पोलिस निरिक्षक संदिप आगरकर यांना अवैध दारू वाहतुकीची चाहुल लागताच आपल्या सहकारी कर्मचाऱ्यांना सोबत घेऊन पाठलाग करत तब्बल सहा लाख रुपये किंमतीचा मुद्देमाल,तसेच दारु तस्करी करणाऱ्या एका आरोपीस अटक केली आहे.आशिष अभिमन अलोने वय २८ वर्षे,रा.माता वार्ड,देसाईगंज,जि.गडचिरोली असे अटकेतील आरोपीचे नाव आहे; तर देसाईगंज शहराच्या गांधी वार्डातील ३६ वर्षीय आशिष नरेन्द्र दहाट हा आरोपी अद्याप फरार असून पोलिसांकडून त्याचा शोध सुरू आहे.

याबाबत अधिक माहिती अशी की,देसाईगंज पोलीस ठाण्याचे सहाय्यक पोलीस निरीक्षक संदिप आगरकर यांना काल रविवारच्या सायंकाळी चंद्रपूर जिल्ह्याच्या ब्रम्हपुरी वरुन देसाईगंज शहरात एका चारचाकी वाहनाने अवैध दारूची तस्करी होत असल्याची गोपनीय माहिती मिळाली.माहिती मिळताच क्षणाचाही विलंब न करता पोलीस पथकासह मार्गावरून जाणाऱ्या वाहनांची तपासणी सुरू केली.दरम्यान,मार्गावरून एमएच २० बीसी ८१६१ क्रमांकाच्या सिल्वर रंगाची मारुती सुझुकी कंपनीची चारचाकी रिड्झ वाहन भरधाव वेगाने पळत सुटली. पोलीस पथकाने तात्काळ वाहनाचा पाठलाग सुरू केला आणि वाहनास अडवले.वाहनाची तपासणी केली असता वाहनात ९० मिली मापाचे २५ बॉक्समध्ये संत्रा ब्रॉंड कंपनीची देशी दारु आढळुन आली.सदर वाहनातून दारू तस्करी करणारा अमन अलोने यास ताब्यात घेतले व सदरची दारू कुठे घेऊन जात आहे; अशी विचारणा केली असता आरोपी अमन अलोने याने आशिष दहाट या इसमाच्या नावाचा उल्लेख केला. पोलिसांनी दहाटचा शोध घेतला असता तो पसार झाला.प्रकरणी पोलिस त्याचा कसुन शोध घेत आहेत. देसाईगंज पोलिसांनी केलेल्या धडक कारवाईने दारु तस्करांचे धाबे दणाणले असुन सदरची कारवाई देसाईगंज पोलीस ठाण्याचे पोलीस निरीक्षक अजय जगताप यांचे मार्गदर्शनात सहाय्यक पोलीस निरीक्षक संदिप आगरकर,पोलीस हवालदार नितेश कडव,विलास विधाते,सामरपल्लिवार व राऊत यांच्या पथकाने पार पाडली.