विषारी सापावर पाय पडताच केला दंश; सुरक्षारक्षकाचा मृत्यू..

चंद्रपूर :-महावितरण कंपनीच्या उपकेंद्रात सुरक्षारक्षक म्हणून कार्यरत असणाऱ्या एका ४० वर्षीय इसमाचा विषारी सापाने दंश केल्याने मृत्यू झाल्याची घटना चंद्रपूर जिल्ह्याच्या गोंडपिपरी तालुक्यातील वेजगाव शेत शिवारात घडली.भीमराव वसंता पेंदोर,रा.वेजगाव, ता.गोंडपिपरी असे मृत्यू झालेल्या सुरक्षा रक्षकाचे नाव आहे.

भीमराव पेंदोर हे विरुर येथील महावितरण कंपनीच्या कर्तव्यावरून घरी परतले होते.त्यानंतर ते शेतात गेले.

शेतातील पीक पाहणी करत असतांनाच गवतात दडून असलेल्या विषारी सापावर त्यांचा पाय पडला.पाय पडताच सापाने दंश केला.लागलीच भीमराव यांना तोहोगाव प्राथमिक आरोग्य केंद्रात नेण्यात आले.तिथे प्राथमिक उपचार केल्यानंतर प्रकृती चिंताजनक असल्याने त्यांना चंद्रपूर जिल्हा रुग्णालयात हलविण्यात आले.उपचार सुरू असतांनाच प्रकृती जास्तच खालावल्याने भीमराव यांचा काल बुधवारी उपचारादरम्यान मृत्यू झाला.मृतक भीमराव हे कुटुंबातील एकमेव कमावते व्यक्ती होते.त्यांच्या पश्चात पत्नी,एक मुलगा,एक मुलगी व आई-वडील असून कुटुंबात शोककळा पसरली आहे.