रेती टाकून भरधाव वेगाने परत जाणारा ट्रॅक्टर पलटी; एकाचा जागीच मृत्यू तर एकजण गंभीर जखमी..

चंद्रपूर :-रेती टाकून भरधाव वेगाने परत जाणारा ट्रॅक्टर पलटी होऊन एका मजुराचा मृत्यू झाला तर ट्रॅक्टर चालक गंभीर जखमी झाल्याची घटना आज,गुरुवार १६ जानेवारीला पहाटे ५ च्या सुमारास चिमूर तालुक्याच्या सावरगाव-नेरी मार्गावरील सावरगाव गावाजवळ घडली.सचिन बापूराव मेश्राम वय ३० वर्षे रा.सावरगाव,ता.चिमूर असे मृत्यू झालेल्या मजुराचे नाव आहे.

सध्या स्थितीत सगळीकडेच अवैध वाळू उपसा होत आहे.अशातच विना नंबरचे ट्रॅक्टर रेती चोरीसाठी वापरून मोठ्या प्रमाणावर शासनास चुना लावल्या जात आहे.रेती चोर चोरीची रेती असल्याने भरधाव वेगात ट्रॅक्टर पळवित असतात.अश्याच प्रकारे आज,गुरुवारी पहाटे सावरगाव येथे रेती टाकून भरधाव वेगाने जात असतांना सावरगाव समोरील छोट्या वळणावर ट्रॅक्टर अनियंत्रीत झाला.यात ट्रॅक्टर बाजूच्या शेतात जाऊन पलटी झाला.पलटी होताच सचिन मेश्राम हा ट्रॅक्टर खाली दबल्याने त्याचा घटनास्थळी जागीच मृत्यू झाला.सदरचा ट्रॅक्टर हा नेरी येथील अनिकेत जांभुळे यांच्या मालकीचा असून ट्रॅक्टर विना नंबरचा आहे.