कोंढाळा ग्रामपंचायतीच्या वतीने मतदान जनजागृती.. – सर्वांनी आवर्जून मतदान करावे- सरपंचा अपर्णा राऊत

कोंढाळा(गडचिरोली):-येत्या २० नोव्हेंबरला होणाऱ्या विधानसभा सार्वत्रिक निवडणुकीची सर्वत्र  जोमात तयारी सुरू असल्याचे दिसत आहे.आरमोरी विधानसभा क्षेत्रात मतदानाची टक्केवारी वाढावी व जास्तीत जास्त मतदारांनी मतदान करावे; याकरिता कोंढाळा ग्रामपंचायतीच्या वतीने मतदारांना जागृत करून मतदानाचे महत्त्व पटवून देण्याचा प्रयत्न केला जात आहे.

देसाईगंज तालुक्याच्या कोंढाळा ग्रामपंचायतीच्या सरपंचा अपर्णा राऊत,उपसरपंच गजानन सेलोटे, ग्रामसेविका मेघना राऊत,ग्रामपंचायतीचे सर्व सदस्य,कर्मचारीवृंद प्रदीप तुपट,अजय भर्रे,गायकवाड यांच्या वतीने मतदानाच्या अधिकाराची माहिती, मतदान यंत्राची माहिती,नोटाची माहिती,मतदानाची वेळ इत्यादीविषयी पत्रकाद्वारे जनजागृती करण्यात येत आहे.याशिवाय व्यसनाधीनता,टीव्ही,मोबाइलचे दुष्परिणाम,शिक्षणाचे,अभ्यासाचे महत्त्व यावरही मार्गदर्शन करण्यात येत आहे.आपले एक मत देशाची, राज्याची परिस्थिती बदलू शकते.आपण सर्वांनी नैतिक मतदान करावे,कोणत्याही प्रलोभनाला बळी पडून मतदान करणे योग्य नाही.सर्वांनी नैतिकतेने, स्वाभिमानाने मतदान करावे; असे आवाहन करण्यात येत आहे.

सरपंचा अपर्णा राऊत यांनी म्हटले की,मतदान हा आपल्याला मिळालेला सर्वांत महत्त्वाचा अधिकार असून मतदान करणे हे आपले कर्तव्य आहे.ती आपणा सर्वांची जबाबदारी आहे,तेव्हा सर्वांनी आवर्जून मतदान करावे, असे मतदारांना आवाहन केले आहे.