उद्यापासून लागू होणार नवी करप्रणाली… – गॅस सिलिंडरच्या किंमतीपासून ते बँक खाते,क्रेडिट कार्ड आदींच्या नियमावलीतील बदलास होणार प्रारंभ..

नवी दिल्ली :-उद्यापासून म्हणजेच १ एप्रिल पासून नवे आर्थिक वर्ष २०२५-२६ सुरू होणार आहे.नव्या आर्थिक वर्षाच्या सुरुवातीस अर्थात उद्या,मंगळवार १ एप्रिलपासून देशात महत्त्वाचे बदल होणार आहेत. एलपीजी गॅस सिलिंडरच्या किंमतीपासून ते बँक खाते,क्रेडिट कार्ड आदींच्या नियमावलीतील बदलास प्रारंभ होणार आहे.केंद्रीय अर्थमंत्री निर्मला सीतारामन यांनी अर्थसंकल्पीय भाषणात जाहीर केलेल्या नवीन कर दरांची अंमलबजावणी उद्या १ एप्रिलपासून होणार आहे.

प्रत्येक महिन्याच्या १ तारखेला तेल आणि वायू वितरण कंपन्यांच्या एलपीजी सिलिंडरच्या किंमतीत बदल होतात.गेल्या काही महिन्यांमध्ये १९ किलोच्या व्यावसायिक एलपीजी सिलिंडरच्या किमतींमध्ये चढ-उतार दिसून आले आहेत; तर घरगुती १४ किलोच्या गॅस सिलिंडरच्या किमती स्थिर आहेत.उद्या २०२५-२६ या नव्या आर्थिक वर्षाच्या सुरुवातीस ग्राहकांना गॅसच्या दरांमध्ये काही प्रमाणात सवलतीची अपेक्षा आहे.१ एप्रिल २०२५ पासून क्रेडिट कार्डच्या नियमांमध्ये मोठे बदल होणार आहेत.यामध्ये रिवॉर्ड पॉईंट्स आणि अन्य सुविधांमध्ये बदल होईल. भारतीय स्टेट बँक आणि पंजाब नॅशनल बँकेसह इतर अनेक बँका त्यांच्या बचत खात्यांमध्ये न्यूनतम शिल्लक नियम बदलत आहेत.नवीन नियमांनुसार, खातेधारकांना सेक्टरनुसार मिनिमम बॅलन्स ठेवावा लागेल.खात्यात पुरेसा शिल्लक नसेल,तर दंड आकारला जाऊ शकतो.यूपीआय अकाऊंट बंद होण्याची शक्यता जर एखाद्या मोबाईल नंबरशी लिंक असलेले यूपीआय खाते दीर्घकाळ सक्रिय नसेल तर बँक ते बंद करू शकते.जर तुम्ही तुमच्या यूपीआय अकाऊंटचा बराच काळ वापर केला नसेल, तर १ एप्रिलपासून तुमच्या बँकेच्या रेकॉर्डमधून तो नंबर हटवला जाऊ शकतो.१२ लाख रुपयांपर्यंत वार्षिक उत्पन्न असलेल्या व्यक्तींना करमुक्ती मिळेल. वेतनधारक कर्मचाऱ्यांसाठी स्टँडर्ड डिडक्शन ७५ हजार रुपये करण्यात आले आहे.याचा अर्थ १२.७५ लाख रुपयांपर्यंत वेतन असलेल्यांना कर भरावा लागणार नाही.हे नियम नवीन कर प्रणाली स्वीकारणाऱ्यांसाठी लागू असतील.