अंत्यविधी व सरपणाकरीता निस्तार दरात जळाऊ लाकूड उपलब्ध करून देण्याची रविंद्र गोटेफोडे यांची मागणी..

कुरखेडा(गडचिरोली):-वन आगार कुरखेडा येथे अंत्यविधी व सरपणाकरीता वेळेवर जळाऊ बिट उपलब्ध होत नसल्याने नागरिकांना अडचणींचा सामना करावा लागत आहे.त्यामुळे,आगारात आवश्यक प्रमाणात जळाऊ बिट उपलब्ध होतील याकरीता नियोजन करावे व गोरगरिबांना निस्तार दरात बिट उपलब्ध करून द्यावे या मागणी करीता आज,बुधवार ८ एप्रिल रोजी माजी नगराध्यक्ष रवींद्र गोटेफोडे यांनी कुरखेडा येथील वन परिक्षेत्र कार्यालयात पोहचत वनअधिकाऱ्यांशी चर्चा करून मागणी केली.

शहर व तालुका वासीयांना अंत्यविधी क्रीये करीता वन आगारात नियमीत जळाऊ लाकूड बिट उपलब्ध असणे आवश्यक आहे.वेळेवर बिट उपलब्ध न झाल्यास पूर्वीच दुःखात असलेल्या कूटूंबाला दुःख बाजूला ठेवत लाकडाकरीता भटकंती करावी लागते. तसेच आगारात उपलब्ध बिटाचे प्रति बिट ३ हजार २०० रुपये दर असल्याने गोरगरिबांना ते आवाक्याच्या बाहेर ठरते.सदर अडचण लक्षात घेत किमान दरात किंवा निस्तार दरात ते उपलब्ध करून द्यावे,तसेच सद्या गॅस टंचाई सुरू असल्याने अनेक कुटुंबांना वेळेवर गॅस उपलब्ध होत नाही.तसेच घरात लग्न किंवा काही अन्य कार्यक्रम असल्यास जळाऊ बिटाची गरज असते.मात्र ते उपलब्ध होत नसल्याने त्यांची अडचण होत आहे.सदर समस्या लक्षात घेत पूर्वी प्रमाणे निस्तार दरात कुटुंबांना जळाऊ बिट उपलब्ध करून देण्याची मागणी रविंद्र गोटेफोडे यांनी वन अधिकाऱ्यांकडे चर्चेत केली.यावेळी वनक्षेत्र सहाय्यक संजय कंकडलवार यांनी अंत्यविधी करीता असलेल्या बिटाचा दर कमी करण्याकरिता उपवनसंरक्षक स्तरावर मागणीसह ठराव पाठविण्यात येणार असल्याचे स्पष्ट केले व मागील दोन वर्षांपासून निस्तार दरात आगारात जळाऊ बिट उपलब्ध नाहीत. मात्र यावर्षी कुप कटाईच्या नियोजन आराखड्याला मंजुरी मिळाली आहे.पुढील १२ वर्षाचा आराखडा तयार करण्यात आला आहे.जगंल कामगार सहकारी संस्था मार्फत कुप कटाईच्या कामाला सुरुवात होणार असल्याने पुढील वर्षांपासून कुटुंबांना निस्तार दरा प्रमाणे जळाऊ बिट कुरखेडा आगारात उपलब्ध राहतील,असे सांगितले.याप्रसंगी वनरक्षक एम.के. दुधबळे हे सुद्धा उपस्थित होते.