२८ वर्षीय इसमास गॅस सिलेंडरच्या काळाबाजार प्रकरणी अटक…

नागपूर :-लहान-मोठ्या गॅस सिलिंडरची काळाबाजारी करणाऱ्या एका रॅकेटचा नागपूर पोलिसांनी भंडाफोड केला आहे.गुन्हे शाखेच्या युनिट क्रमांक पाचच्या पथकाने कळमना पोलिस ठाण्याच्या हद्दीत ही कारवाई केली.प्रीतपालसिंग ऊर्फ प्रीतगुरुचरणसिंग बागल वय २८ वर्षे,मिनीमातानगर, असे आरोपीचे नाव आहे.तो घरीच घरगुती व व्यावसायिक सिलिंडरचा साठा करून त्यातील गॅस इतर सिलिंडरमध्ये भरून त्यांची अवैध पद्धतीने विक्री करत होता.पोलिसांना याची माहिती कळताच त्यांनी धाड टाकली.आरोपीला रंगेहाथ पकडण्यात आले.तो मशीनच्या साहाय्याने गॅस एका सिलिंडरमधून दुसऱ्यात भरत होता.या प्रकारामुळे आजूबाजूच्या वस्तीत जीवीतहानीचादेखील धोका होता.त्याच्या ताब्यातून वेगवेगळ्या कंपनीचे घरगुती व व्यावसायिक प्रकारचे लहान व मोठे असे एकूण ५९ सिलिंडर,गॅस रिफिलिंग करण्याची मशीन व चारचाकी वाहन,असा ३.११ लाखांचा मुद्देमाल जप्त करण्यात आला. आरोपीविरोधात कळमना पोलिस ठाण्यात जीवनावश्यक वस्तू कायद्याअंतर्गत गुन्हा दाखल करण्यात आला आहे.पोलिस निरीक्षक राहुल शिरे, राहुल रोटे,राजेंद्र टाकळीकर,अमोल भक्ते,विशाल नागभिडे, सुधीर तिवारी,आशिष पवार यांच्या पथकाने ही कारवाई केली.

आरोपी प्रीतकडे एचपी व स्थानिक कंपनीचे सिलिंडर्स आढळून आले.सिलिंडर पुरवठा करणाऱ्यांसोबत त्याने हातमिळवणी केली असण्याची शक्यता आहे. काही काळाअगोदर मानेवाडा मार्गावरदेखील अशाच प्रकारची कारवाई झाली होती.सेंट्रल एव्हेन्यूवर काही रेस्टॉरन्ट चालकांना अशाच पद्धतीच्या रॅकेटच्या माध्यमातून अवैधपणे व्यावसायिक सिलिंडर पुरविण्यात येत होते.या प्रकरणात प्रीतला कुठल्या गॅस एजन्सीकडून इतके सारे सिलिंडर्स मिळाले व कुणाशी त्याची लिंक आहे; याची चौकशी होणार काय? असा सवाल उपस्थित होत आहे.