२४ वर्षीय गरोदर मातेचा गर्भातील बाळासह मृत्यू; समाजमन सुन्न..

भंडारा :-एका २४ वर्षीय नऊ महीन्याच्या गरोदर मातेचा गर्भातील बाळासह तुमसर उपजिल्हा रुग्णालयात उपचारादरम्यान मृत्यू झाल्याने समाजमन सुन्न झाल्याची घटना २४ फेब्रुवारीच्या मध्यरात्री एक वाजताच्या सुमारास उघडकीस आली.भंडारा जिल्ह्याच्या तुमसर तालुक्यातील नाकाडोंगरी प्राथमिक आरोग्य केंद्र अंतर्गत येत असलेल्या आष्टी येथिल सुनिता दुर्गेश सोयाम वय २४ वर्षे असे मृत गरोदर महीलेचे नाव आहे.

सुनिता सोयाम या नऊ महिन्यांच्या गरोदर महीलेला एक दिवसा अगोदर तिला प्रसुतीच्या कळा आल्या होत्या.दरम्यान,तिच्या पतीने सर्वप्रथम प्राथमिक आरोग्य केंद्र नाकाडोंगरी येथे उपचारासाठी दाखल  केले होते.अशातच डॉक्टरांनी तिच्या प्रसुतीला वेळ आहे म्हणून घरी पाठविले होते.दरम्यान,दुसऱ्या दिवशी सुनिताला प्रसुतीच्या तिव्र वेदना झाल्या. त्यावेळी उपचारार्थ तुमसर उपजिल्हा रुग्णालयात दाखल करण्यात आले.येथिल डॉक्टरांनी तिला रुग्णालयात उपचारार्थ दाखल केले.परंतु उपचारादरम्यान गरोदर महीलेच्या गर्भातील नऊ महीन्याच्या बाळासह मृत्यू झाल्याची धक्कादायक घटना समोर आली.सदर घटनेने तालुक्यासह जिल्ह्यात एकच खळबळ उडाली आहे.सदर गरोदर महीलेचा मृत्यू हा प्रसुती कळा येत असतांना हृदय विकाराच्या झटक्याने झाल्याचा प्राथमिक अंदाज येथिल वैद्यकीय अधिकाऱ्यांनी व्यक्त केला असला तरी नेमका मृत्यू कशामुळे झाला हे शवविच्छेदन अहवालानंतर स्पष्ट होणार असल्याचे डॉक्टरांचे म्हणणे आहे.