सावधान..! महाराष्ट्र पोलीस डायल ११२ क्रमांकावर खोटी माहिती देणे पडेल महागात.. – हत्येची खोटी माहिती देणाऱ्या तरुणावर गुन्हा दाखल..

भंडारा :-महाराष्ट्र पोलीस डायल ११२ क्रमांक हा आपत्कालीन सेवांसाठी असून एखादी अनुचित घटना किंवा प्रकार घडत असल्यास पोलीस विभागाच्या वतीने जलद प्रतिसाद देऊन नागरिकांच्या समस्यांचे तात्काळ निवारण करण्यात येते.मात्र,काहीजण ११२ क्रमांकावर खोटी माहिती वा इतर गोंधळात टाकणारे घटनाक्रम सांगून पोलिसांना त्रास देण्याचा प्रयत्न करीत असतात.असे करणे म्हणजे स्वतःला कायद्याच्या कचाट्यात ओढवून घेणे ठरू शकते.त्यामुळे गंमत म्हणून केलेला एक कॉल महागात पडल्याशिवाय राहणार नाही.अश्याच प्रकारे एका तरुणाने गंमत म्हणून डायल ११२ वर कॉल केला आणि एका तरुणीची हत्या झाल्याची खोटी माहिती दिली.पोलिसांनी घटनेचे गांभीर्य लक्षात घेता तात्काळ घटनास्थळी धाव घेतली.मात्र, घटनास्थळी काहीही आढळून आले नसल्याने पोलीस अधीक्षक यांनी तरुणावर गुन्हा दाखल करण्याचे आदेश दिले.सदर प्रकरण असे की,भंडारा येथील नवीन टाकळीच्या,भगतसिंह वॉर्डातील रिता रामभाऊ देशकर नामक सिमकार्ड असलेल्या क्रमांकावरून तरुणाने डायल ११२ वर फोन करून एका तरुणीची हत्या झाल्याची खोटी माहिती दिली.तरुणाने डायल ११२ क्रमांकावर सांगितले की,नगर परिसरात एका मुलीची हत्या करण्यात आली आहे.घटनेचे गांभीर्य लक्षात घेता डायल ११२ च्या डिस्पॅचरने तात्काळ भंडारा पोलिसांना माहिती दिली.सूचना मिळताच वरठी पोलिस स्टेशनचे प्रभारी अधिकारी व त्यांचा स्टाफ घटनास्थळी दाखल झाले.मात्र,तपास केला असता कोणतीही हत्या किंवा गुन्हेगारी घटना घडलेली आढळली नाही.यानंतर पोलिसांनी दिलेल्या मोबाइल क्रमांकावर संपर्क साधण्याचा प्रयत्न केला.परंतु फोन बंद येत होता.अखेर भंडारा सायबर सेलच्या मदतीने कॉल करणाऱ्याची माहिती मिळाली.त्यानुसार खोटी माहिती दिल्याचे निष्पन्न झाले.प्रकरणी पोलिस अधीक्षकांनी गंभीर बाब मानून संबंधित तरुणाविरोधात गुन्हा दाखल करण्याचे आदेश दिले.त्यानुसार भंडारा पोलिस ठाण्यात भारतीय न्याय संहिता २०२३ च्या कलम २१७ अंतर्गत गुन्हा दाखल करण्यात आला.