सावधान..! कोंढाळा जंगल परिसरात टस्कर हत्तीची एंट्री..

देसाईगंज(गडचिरोली):-आरमोरी तालुक्याच्या वैरागड परिसरात गेल्या अनेक दिवसांपासून जंगली हत्तींचा वावर आहे.नुकतेच जंगली हत्तींच्या कळपाने मंगळवारच्या मध्यरात्री आरमोरी तालुक्याच्या वैरागड परिसरातील धान पिकांची नासधूस केली.कळपातून भरकटलेल्या एका टस्कर हत्तीने वासाळाच्या जंगल परिसरातील कक्ष क्रमांक-७४५ मधून जंगल मार्गे सालमारा जंगल परिसरात मार्गक्रमण करत वैरागड ते आरमोरी मार्गावरील धान पऱ्हे व रोवणी केलेल्या अनेक शेतकऱ्यांच्या धानपिकांचे मोठ्या प्रमाणावर नुकसान केल्याने शेतकरी बांधव चिंताग्रस्त झाले असतांनाच आता हत्तींच्या कळपातून भरकटलेल्या एका टस्कर हत्तीने देसाईगंज तालुक्याच्या कोंढाळा जंगल परिसरात एंट्री केल्याने शेतकऱ्यांसह नागरिक भयभीत झाले आहेत.टस्कर हत्ती हा कोंढाळा जंगल परिसराच्या कक्ष क्रमांक-५८ व ५९ परिसरात असल्याचे वन विभागाच्या वतीने जंगल परिसरात लावण्यात आलेल्या कॅमेरात कैद झाला असल्याने सदरची बाब उघडकीस आली. काल,गुरुवार १७ जुलै रोजी हत्तींच्या कळपातून भरकटत तो कोंढाळाच्या जंगल परिसरात दाखल झाला असून सध्या स्थितीत एकच टस्कर हत्ती जंगल परिसरात असल्याची माहिती आहे.काल गुरुवार पासून तो जंगल परिसरात भ्रमंती करीत असल्याने जंगल परिसरात जाऊ नये तसेच परिसरातील नागरिकांनी सतर्कता बाळगण्याचे आवाहन वन विभागाच्या वतीने करण्यात आले आहे.