सात हजाराची लाच भोवली; महिला ग्रामसेवक एसीबीच्या जाळ्यात..

भंडारा :-जिल्ह्याच्या लाखांदूर तालुक्यात भंडारा लाच लुचपत प्रतिबंधक विभागाने मोठी कारवाई करत तब्बल सात हजाराची लाच घेतांना एका महिला ग्रामसेविकेस रंगेहाथ पकडले.रंजू मधुकर अंबादे वय ४१ वर्षे,रा.दिघोरी मोठी,ता.लाखांदूर,जि.भंडारा असे लाचखोर महिला ग्रामसेवकाचे(ग्रामपंचायत अधिकारी)नाव असून त्या मोहरणा ग्रामपंचायतीत कार्यरत आहेत.सदरची कारवाई ही काल गुरुवारी दुपारच्या सुमारास लाखांदूर येथील तहसील कार्यालयाच्या प्रवेशद्वारासमोरील साकोली ते देसाईगंज(वडसा)मार्गावर करण्यात आली.

प्रकरणातील तक्रारदार तरुणास त्याच्या आईच्या नावाने मोहरणा ग्रामपंचायत क्षेत्रातील शेतशिवारात पोल्ट्री फार्म म्हणजेच कुक्कुटपालन व्यवसाय सुरू करायचा होता. याकरिता ग्रामपंचायत प्रशासनाकडून नाहरकत प्रमाणपत्र(एनओसी)ची गरज होती.त्यामुळे तक्रारदार तरुणाने ग्रामपंचायत अधिकारी रंजू अंबादे यांच्याकडे नाहरकत प्रमाणपत्रासाठी अर्ज सादर केला होता. मात्र,नाहरकत प्रमाणपत्र लवकर पाहिजे असल्यास १० हजार रुपये लागतील,अन्यथा ७ हजार रुपये द्यावे लागतील,अशी मागणी अंबादे यांनी केली होती. तक्रारदाराची लाच देण्याची इच्छा नसल्याने त्यांनी भंडारा लाचलुचपत प्रतिबंधक विभागाकडे (एसीबी) तक्रार नोंदवली.तक्रारीच्या आधारे पथकाने लाच मागणीची पडताळणी केली असता,रंजू अंबादे यांनी ७ हजार रुपयांची लाच मागितल्याचे निष्पन्न झाले. त्यानुसार,लाच लुचपत प्रतिबंधक विभागाच्या पथकाने लाखांदूर येथील तहसील कार्यालयाच्या प्रवेशद्वारासमोरील साकोली ते देसाईगंज(वडसा) मार्गावर सापळा रचला असता रंजू अंबादे यांना तक्रारदाराकडून ७ हजार रुपयांची लाच स्वीकारतांना  पथकाने रंगेहाथ पकडले.याप्रकरणी लाखांदूर पोलिस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.