उद्रेक न्युज वृत्त
चंद्रपूर :- ताडोबा-अंधारी व्याघ्र प्रकल्पाच्या बफर झोन मधील मोहर्ली वनपरिक्षेत्रातील देवाडा बिट क्रमांक १६५ मध्ये गावापासून अवघ्या ५० फुटांवर सरपण आणण्यासाठी गेलेल्या महिलेवर हल्ला करून वाघाने महिलेचा बळी घेतल्याची घटना काल,मंगळवारी २८ मे रोजी दुपारी २ वाजता घडली.यामुळे खळबळ माजली आहे.ताडोबाच्या बफर झोन मध्ये मोहर्ली वनपरिक्षेत्रातील देवाडा नियतक्षेत्रात चंदा राजेश्वर चिकराम वय ३२ वर्षे ही महिला घरगुती वापरास्तव सरपण आणण्यासाठी गेली होती.त्यावेळी अचानक वाघाने हल्ला करून तिच्या नरडीचा घोट घेतला.घटनेची माहिती मिळताच घटनास्थळी वनविभागाचे वन परिक्षेत्राधिकारी संतोष थीपे व पोलिस निरीक्षक लता वाळके आपल्या पथकासह तातडीने दाखल झाले.मृत व्यक्तीचे नातेवाईकांस तात्पुरती तातडीची ५० हजार रुपयांची सानुग्रह आर्थिक मदत देण्यात आली आहे.लगतच्या जंगल परिसरात वाघाचा वावर असल्यामुळे सतर्कतेचा इशारा वनविभागामार्फत देण्यात आलेला आहे.जंगलात न जाण्यापासून व वन्यप्राण्याच्या हल्ल्यापासून बचावासाठी जनजागृती करण्यात येत आहे.सदर परिसरात गस्त वाढविण्यात आलेली असुन वाघाचा मागोवा घेण्याकरीता ‘ट्रॅप कॅमेरे’ बसविण्यात आलेले आहे.
