रेती माफियांचा नवा फंडा; थेट कंटेनर वाहनातून रेती तस्करी..

गोंदिया :-कोणत्याही विभागाचा अधिकारी असो वा कर्मचारी,यांनी मनात आणले तर सर्व अवैध कारभार, धंदे व मनमानीला चाप बसल्याशिवाय राहणार नाही.पण, हल्ली इमानदारीचा धंदाच राहिलेला नाही.वरचा अधिकारीच अंगाला हळद लावत नसल्याने खालचा कर्मचारी करणार तरी काय?त्यामुळे,जसे चालत आहे ना चालू द्या.! अशी अनेकांची मनधारणा झालेली आहे. अश्यातच गोंदिया जिल्ह्याच्या गोरेगाव महसूल विभागाने अवैध रेती वाहतुकीविरोधात आक्रमक भूमिका घेतली असून,गेल्या काही दिवसांपासून अवैध रेती वाहतूक करणाऱ्या ट्रॅक्टर व टिप्परवर सातत्याने कारवाई केली जात आहे.अश्यातच रेतीमाफियांनी नवा फंडा वापरून ट्रॅक्टर,टिप्परवर कारवाई केली जात असल्याने चक्क कंटेनर वाहनातून रेतीतस्करी करून महसूल प्रशासनास चॅलेंज केलेले असतांनाच तस्करांचा ‘फिल्मी स्टाईल’ ने पाठलाग करीत मुसक्या आवळल्या.सदरचा प्रकार गोंदिया कोहमारा महामार्गावर उघडकीस आला. कारवाईने रेतीतस्करांमध्ये एकच खळबळ उडाली आहे.

गोरेगाव तहसील प्रशासनास एका कंटेनर वाहनातून रेती तस्करी केली जात असल्याची गोपनीय माहिती मिळाली होती.सदरचा कंटेनर गोंदियाहून कोहमाराकडे निघाला आहे.या माहितीच्या आधारे तहसील कार्यालयासमोर सापळा रचण्यात आला. ताळपत्रीने झाकलेला एमएच ४० सीएम् ९५९९ क्रमांकाचा कंटेनर येताच तहसीलदार प्रज्ञा भोकरे व पथकाने कंटेनर थांबवून तपासणी केली असता अवैध रेती वाहतूक केली जात असल्याचे निष्पन्न झाल्याने तात्काळ कारवाई करीत कंटेनर ताब्यात घेण्यात आला.सदरची कारवाई तहसीलदार प्रज्ञा भोकरे, पथकातील विलास मोदरकर,पी.वाय.रहांगडाले व आर.बी.राऊत यांनी केली.कंटेनरचा मालक रोहित गुलहानी असून तहसीलदारांनी केलेल्या या धडक कारवाईमुळे रेती माफियांमध्ये खळबळ माजली आहे.