मार्गावर गाय आडवी आल्याने दुचाकी चालकाचा अपघाती मृत्यू; पत्नी आणि मुले बचावली..

नागपूर :-आपल्या स्वगावाहून पत्नी आणि दोन पाच वर्षांच्या मुलांसह दुचाकीने निघालेल्या दुचाकी चालकाचा नागपूर जिल्ह्याच्या खुर्सापार नजीकच्या मार्गावर अचानक गाय आडवी आल्याने दुचाकीवरील नियंत्रण सुटून घडलेल्या अपघातात दुर्दैवी मृत्यू झाला,तर दुचाकीवरील पत्नी आणि दोन्ही चिमुकले सुदैवाने बचावली.प्रवीण रामकृष्ण गिऱ्हाडे वय ३७ वर्षे,रा. नारा,ता.कारंजा,जि.वर्धा असे मृतकाचे नाव आहे.

माहितीनुसार,कारंजा तालुक्याच्या नारा येथील प्रवीण  गिऱ्हाडे हे काल बुधवारी पत्नी व पाच वर्षाची मुलगी आणि पाच वर्षाचा मुलगा यांना सोबत घेऊन एमएच ३२ एवाय ३०७७ क्रमांकाच्या दुचाकीने नागपूरकडे

जाण्यासाठी निघाले होते.दरम्यान,नागपूर जिल्ह्यातील खुर्सापार जवळ येताच अचानक एक गाय रस्त्यावर आडवी आली,ज्यामुळे प्रवीण गिऱ्हाडे यांचे वाहनावरील नियंत्रण सुटले आणि भीषण अपघात घडला.यात प्रवीणचा जागीच मृत्यू झाला.घटनेची माहिती नारा गावात पोहचताच आई-वडिलांनी एकच टाहो फोडला. प्रवीण गिऱ्हाडे यांच्या पश्चात आई-वडील,पत्नी,मुलगी व मुलगा पाच वर्षाचा असून पार्थिवावर मोक्षधामात अंत्यसंस्कार करण्यात आले.झालेल्या अकस्मात मृत्यूने नारा गावावर शोककळा पसरली आहे.