भरदिवसा चोरी; महिला ओरडत राहिली अन् चोरटे क्षणात दिसेनासे झाले..

भंडारा :-भरदिवसा अज्ञात चोरट्यांनी महिलेच्या हातातील ५० हजार रुपये असलेली पर्स हिसकावून पोबारा केल्याने परिसरात एकच खळबळ माजली. महिला ओरडत राहिली अन् चोरटे क्षणात दिसेनासे झाल्याची घटना १२ जानेवारी रोजी तुमसर शहराच्या गोवर्धननगर भागातील दुर्गा मंदिरासमोरील गल्लीत घडली.अनिता चामट वय ४५ वर्षे,रा.इंदिरानगर ता.तुमसर,जि.भंडारा असे फिर्यादी महिलेचे नाव असून त्या सोमवारी दुपारच्या सुमारास शहरातील स्टेट बँक ऑफ इंडियाच्या शाखेत गेल्या होत्या.त्यांनी आपल्या बँक खात्यातून ५० हजार रुपयांची रोकड काढली आणि त्या घरी जाण्यासाठी निघाल्या. यादरम्यान,गोवर्धन नगरमधील दुर्गा मंदिर समोरील गल्लीतून जात असतांना,अचानक आलेल्या अज्ञात चोरट्यांनी त्यांच्या हातातील पैशांची पर्स हिसकावून वेगाने पळ काढला.अचानक घडलेल्या प्रसंगाने त्या काहीकाळ गोंधळून गेल्या.आरडाओरड करेपर्यंत चोरटे क्षणात नजरेआड झाले.घटनेची माहिती मिळताच तुमसर पोलिसांनी घटनास्थळी धाव घेत पंचनामा केला.प्रकरणी तुमसर पोलिसांनी अज्ञात चोरट्यांविरुद्ध गुन्हा दाखल करून बँकेपासून ते घटनास्थळापर्यंतच्या मार्गावरील विविध सीसीटीव्ही कॅमेरे पोलिसांकडून तपासले जात आहेत.