प्रकृतीत सुधारणा; बाळ विक्री प्रकरणातील डॉक्टरला बेड्या.. – आज न्यायालयापुढे करणार हजर..

भंडारा :-बाळ विक्री प्रकरणातील संपूर्ण रॅकेटचा मुख्य सूत्रधार तथा गोंदियाच्या ‘न्यू बालाजी हॉस्पिटल’ चा संचालक नितेश वाजपेयी याने अटकेच्या धास्तीने स्वतःला संपवण्याचा प्रयत्न केला होता.आरोपी डॉक्टर नीतेश वाजपेयी शनिवार १४ फेब्रुवारी रोजी मध्य प्रदेशच्या कटंगी येथून स्वतःच्या वाहनाने भंडाऱ्याच्या दिशेने निघाला होता.प्रवासादरम्यान त्याने स्वतःजवळ असलेल्या ब्लेडने शरीरावर आणि पोटावर गंभीर वार करून घेतले होते.रक्ताच्या थारोळ्यात असलेल्या डॉक्टराला तातडीने तुमसर येथील शासकीय रुग्णालयात दाखल करण्यात आले.प्रकृती चिंताजनक असल्याने त्याला पुढील उपचारासाठी भंडाऱ्यातील लक्ष हॉस्पिटलमध्ये भरती करण्यात आले होते.तेव्हापासून त्याच्यावर उपचार सुरू होते.अश्यातच त्याने मंगळवार १७ फेब्रुवारी रोजी भंडारा जिल्हा सत्र न्यायालयात अटकपूर्व जामीन अर्ज केला होता. प्रकरणी न्यायालयाने अटकपूर्व जामीन अर्ज फेटाळून लावला होता.त्यामुळे पोलीस प्रशासन त्याच्या प्रकृतीत सुधारणा होण्याची वाट बघत असतांनाच रुग्णालयातील डॉक्टरांनी त्याला तंदुरुस्त घोषित करताच पोलिसांनी काल गुरुवारच्या सायंकाळी ताब्यात घेतले आहे.अटक करण्यात आलेल्या डॉ.वाजपेयीला आज,शुक्रवार २० फेब्रुवारीला भंडारा जिल्हा सत्र न्यायालयात हजर करून पोलिस कोठडीची मागणी केली जाणार आहे.पोलीस कोठडी मिळताच प्रकरणास मोठे वळण येणार असल्याची शक्यता वर्तविण्यात येत आहे.महत्वाचे म्हणजे,यापूर्वी आणखी काही बाळांची अश्याच प्रकारे विक्री केली की काय? याचाही उलगडा होऊ शकतो.