नैनपूरच्या महात्मा गांधी नगरपरिषद शाळेत श्रमदानातून स्वच्छतेचा प्रेरणादायी संदेश..

देसाईगंज(गडचिरोली):- “माझा गाव…माझी शाळा…माझी जबाबदारी” या संकल्पनेतून देसाईगंज शहराच्या नैनपूर येथील महात्मा गांधी नगरपरिषद उच्च प्राथमिक शाळेत आज,सोमवार २९ जून रोजी सकाळच्या सुमारास भव्य स्वच्छता व श्रमदान मोहीम उत्साहात पार पडली.

शाळेचे मुख्याध्यापक खेमराज तिघरे यांच्या नेतृत्वात तथा मार्गदर्शनाखाली आयोजित या उपक्रमात गावातील युवक-युवती,महात्मा गांधी स्काऊट-गाईड पथक,कब-बुलबुल पथक तसेच ग्रामस्थांनी उत्स्फूर्त सहभाग नोंदविला.विशेषतः गजानन कवासे यांनी व शाळेतील स्काऊट गाईड मुलांनी श्रमदान करून समाजापुढे एक आदर्श निर्माण करत इतरांनाही श्रमदानाचा प्रेरणादायी संदेश दिला.

या कार्यक्रमाला शाळा व्यवस्थापन समितीचे अध्यक्ष उमाकांत कवासे यांनी उपस्थित राहून उपक्रमाचे कौतुक केले.शाळेच्या शिक्षिका भारती राऊत,तसेच शिक्षक मंगेश तूपट,ईश्वर गाहाने,प्राची खरकाटे, तृषाली सुखदेवे यांनीही प्रत्यक्ष श्रमदान करून विद्यार्थ्यांसमोर आदर्श निर्माण केला.

श्रमदानाद्वारे शाळा परिसराची स्वच्छता,तण काढणे, परिसर सुशोभीकरण आदी कामे करण्यात आली. “स्वच्छ शाळा,सुंदर शाळा आणि संस्कारक्षम वातावरण” हा संदेश देत सर्वांनी सामाजिक जबाबदारीची जाणीव व्यक्त केली.या उपक्रमामुळे शाळा परिसर अधिक स्वच्छ,सुंदर व आकर्षक झाला असून उपस्थितांनी भविष्यातही अशा सामाजिक उपक्रमांमध्ये सक्रिय सहभाग घेण्याचा संकल्प व्यक्त केला.