धक्कादायक घटना..! दुर्गा मातेच्या मंदिरात एका दिवासाचा नवजात बाळ आढळला मृतावस्थेत..

भंडारा :-जिल्ह्याच्या तुमसर तालुक्यातील गोबरवाही पोलिस ठाण्याच्या हद्दीत येणाऱ्या कटंगी मार्गावरील शिवतीर्थ परिसरातील दुर्गा मातेच्या मंदिरात एका दिवासाचे नवजात बाळ मृतावस्थेत आढळून आल्याने परिसरात एकच खळबळ उडाली.मानवी मनाला कीव येईल अशी धक्कादायक घटना काल मंगळवारी सकाळच्या राजापूर-नाकाडोंगरी येथील मुख्य मार्गावरील श्री क्षेत्रात उघडकीस आली.मॉर्निंग वॉककरीता मंदिराच्या खुल्या परिसरात फेरफटका मारणाऱ्या स्थानिकांना सदरची बाब लक्षात येताच तात्काळ गोबरवाही पोलिसांना घटनेची माहिती देण्यात आली. परिसरातील दुर्गा मातेच्या अलगद पायाजवळ कापडात गुंडाळून ठेवलेल्या त्या निष्पाप जीवाला कोण तिथे सोडून गेले? त्या अर्भकाला तिथे सोडताना तो जिवंत होता का?असल्यास इतक्या कडाक्याच्या थंडीमुळे तो दगावला असावा? कुण्या कुमारी मातेने त्याला तिथे सोडले असावे,अशी कुजबूज अनेकांच्या मनात सुरू झाली.पोलिसांच्या प्राथमिक चौकशीत मृत आढळून आलेला तो बाळ कुणाचा? याबाबत स्पष्टता होऊ शकली नाही.घटनास्थळी दाखल पोलिस व वैद्यकीय चमूने वर्तविलेल्या प्राथमिक अंदाजानुसार घटना सोमवारच्या मध्यरात्रीची असावी.त्यातही देवीच्या पायाशी बाळाला ठेवते वेळी तो जिवंत असावा आणि कडाक्याच्या थंडीमुळे तो दगावला असावा,असा अंदाज वर्तविण्यात येत आहे.उत्तरीय तपासणी नंतरच वास्तविकता पुढे येणार आहे.