जेवणासाठी भाजी मागण्याकरिता गेलेल्या १३ वर्षीय अल्पवयीन मुलीवर अत्याचार..

भंडारा :-घराशेजारी राहणाऱ्या एका ५० वर्षीय नराधमाने १३ वर्षीय अल्पवयीन मुलीवर अत्याचार केल्याची घटना भंडारा जिल्ह्याच्या लाखनी तालुक्यातील एका गावात उघडकीस आली आहे.नराधमाने पीडित अल्पवयीन मुलीला तिच्या आई-वडिलांना जीवे मारण्याची धमकी दिल्याने तिने याबाबत कुठेही वाच्यता केली नाही.मात्र,शारीरिक बदल आणि तब्बल चार महिने मासिक पाळी न आल्याने कुटुंबीयांनी तिला शासकीय रुग्णालयात नेले असता ती चार महिन्यांची गर्भवती असल्याचे कळल्याने पालकांना मोठा मानसिक धक्का बसला.प्रकरणी पीडिता व तिच्या आई-वडिलांनी पोलीस ठाण्यात धाव घेत तक्रार नोंदवली.घटनेचे गांभीर्य लक्षात घेता लाखनी पोलिसांनी भारतीय न्याय संहितेच्या कलम ६४(२)(आय),६५(१)सहकलम ४,६ बाल लैंगिक अत्याचार अधिनियम २०१२ नुसार गुन्हा दाखल केला व आरोपी रतनलाल उर्फ जागेश्वर सुरचंद कुळमते वय ५० वर्षे यास अटक केली.

ग्रामीण भागातील ग्रामस्थ आजही एकोप्याने राहतात. त्यातच,घराशेजारी राहणारे गुण्यागोविंदाने एकमेकांच्या सुख दुःखात सहभागी होतांना दिसून येतात.अश्याच प्रकारे पिडीत मुलीचे कुटूंबीय व आरोपी यांच्याशी घनिष्ट संबंध असल्याने डिसेंबर २०२५ मध्ये पिडीत अल्पवयीन मुलगी जेवणासाठी भाजी मागण्याकरिता आरोपी रतनलालच्या घरी गेली.रतनलाल घरी एकटाच होता. त्याचवेळेस त्याने पीडितेवर लैंगिक अत्याचार केला. अत्याचारानंतर जीवे मारण्याची धमकी दिली.घडलेल्या प्रसंगाने मुलगी घाबरली आणि तिच्या घरी परतली.तिने तब्बल चार महिने मानसिक धक्का सहन केला.त्यानंतर, शारीरिक बदल आणि चार महिने मासिक पाळी न आल्याने आरोपी नराधमाचे कृत्य समोर आले.प्रकरणी लाखनी पोलिसांनी आरोपीला बेड्या ठोकल्या.राज्यात महिलांवरील आणि अल्पवयीन मुलींवरील अत्याचाराच्या घटना सातत्याने समोर येत असतांना,भंडारा जिल्ह्यातील या घटनेमुळे जिल्हाभर संतापाची लाट उसळली आहे.