जुनी वडसाच्या पीएमश्री छत्रपती शिवाजी महाराज नगर परिषद शाळेत क्षयरोगाबाबत जनजागृतीपर कार्यक्रम संपन्न..

देसाईगंज(गडचिरोली):-देसाईगंज शहराच्या जुनी वडसा येथील पीएमश्री छत्रपती शिवाजी महाराज नगरपरिषद उच्च प्राथमिक शाळेत आज,मंगळवार १२ ऑगस्ट रोजी क्षयरोगाबाबत जनजागृतीपर विशेष कार्यक्रमाचे आयोजन करण्यात आले होते.कार्यक्रमात शालेय विद्यार्थ्यांना क्षयरोगाची कारणे,लक्षणे, प्रतिबंधात्मक उपाय व उपचार याबाबत सविस्तर मार्गदर्शन करण्यात आले.तसेच योग्य आहार,स्वच्छता व लसीकरणाचे महत्त्वही अधोरेखित करण्यात आले.

त्याचप्रमाणे विद्यार्थ्यांच्या शंकानिरसनासाठी प्रश्नोत्तर सत्र घेण्यात आले.सदर कार्यक्रमाच्या अध्यक्षस्थानी अपेक्षा देशपांडे,अप्रेंटिव्ह टीचर यांनी भूषविले.तर प्रमुख उपस्थितीत शाळेचे मुख्याध्यापक किशोर चव्हाण,शिक्षक शिवराम हाके,राहुल मस्के,मुजाहिद खा पठाण,शिक्षिका खरकाटे,कुमारी वनिता अढाऊ (समुपदेशिका,ग्रामीण रुग्णालय देसाईगंज)तसेच स्मिता डोंगरे(मार्गदर्शक,टीबी हेल्प विजिटर,ग्रामीण रुग्णालय देसाईगंज)यांचा समावेश होता.कार्यक्रमाचे संचालन मुख्याध्यापक किशोर चव्हाण यांनी केले,तर आभार प्रदर्शन शिवराम हाके यांनी मानले. उपक्रमामुळे विद्यार्थ्यांमध्ये आरोग्यविषयक सजगता वाढली असून समाजात क्षयरोग प्रतिबंधाचा संदेश पसरविण्यास हातभार लागणार असल्याचे मत शाळेचे मुख्याध्यापक किशोर चव्हाण यांनी व्यक्त केले.