आरमोरी तालुक्यातील रानटी हत्तींनी केलेल्या नुकसानीची शेतकऱ्यास भरपाई मंजूर..

गडचिरोली :-जिल्ह्याच्या देसाईगंज-वडसा वन विभागांतर्गत येणाऱ्या आरमोरी तालुक्यातील सूर्यडोंगरी शिवारात रानटी हत्तींनी केलेल्या मका पिकाच्या नुकसानीची भरपाई शेतकऱ्यास मंजूर करण्यात आली असल्याची माहिती देसाईगंज-वडसा वन विभागाचे उपवनसंरक्षक वरुण बी.आर.यांनी दिली आहे. गडचिरोली जिल्ह्याच्या आरमोरी तालुक्यातील सुर्यडोंगरी शिवारात १८ मार्च २०२५ रोजी हत्तींनी देविदास बालाजी मेश्राम यांच्या शेतात मका पिकाचे नुकसान केले होते.त्यानुसार पोर्ला वनपरिक्षेत्रातील कर्मचारी,कृषी सहाय्यक तसेच तलाठी यांनी तात्काळ पंचनामा करून देसाईगंज-वडसा वन विभागास प्रकरण सादर केले.वन विभागाच्या उपवनसंरक्षक कार्यालयने शेतकरी मेश्राम यांना नुकसानभरपाई मंजूर करण्यात आली असून देसाईगंज-वडसा वनविभागाकडून शेतपिक नुकसानभरपाई प्रकरणे योग्य त्या शासन निर्णयांना अनुसरुन लवकरात-लवकर अदा करण्यात येणार असल्याचेही उपवनसंरक्षक वरूण बी.आर.यांनी कळविले आहे.