अन् क्षणात कुटूंबात पसरली स्मशान शांतता .. – सासरी गेलेल्या चुलत बहिणीने ओल्याच मेहंदीने परत येऊन बहिणीच्या तिरडीला दिला खांदा..

भंडारा :-मन्न सुन्न करणारी घटना भंडारा जिल्ह्याच्या मोहाडी तालुक्यात काल,बुधवारी २१ मे रोजी घडली. चुलत बहिणीचा लग्न सोहळा आटोपून तिरोडा येथे कर्तव्यावर जात असलेल्या तरुणीच्या दुचाकीला काळाने झडप घालून ट्रकने चिरडले.त्यात शारदा दामोधर पुंडे वय २६ वर्षे,रा.नवेगाव (धुसाळा), ता.मोहाडी,जि.भंडारा हिचा जागीच मृत्यू झाला. अपघाताची माहिती कुटूंबियांना होताच आनंदावर क्षणात विर्जन पडून शोककळा पसरली.मृतक शारदा ही मागील वर्षीच स्पर्धा परीक्षा देऊन तिरोडा येथे पाटबंधारे विभागात रुजू झाली होती.तीन दिवसाअगोदर तिच्या चुलत बहिणीचे नवेगाव येथे लग्न सोहळा असल्याने ती गावी परतली होती.पुंडे कुटूंबात आनंदाचे वातावरण होते.मंगळवारी २० मे रोजी मोठ्या हर्षोल्हात चुलत बहिणीचा लग्न सोहळा पार पडला.सायंकाळी चुलत बहिणीला सासरी पाठविण्यात आले.सर्वत्र आनंदाचे वातावरण असतांना नियतीच्या मनात कोणता डाव होता,हे कळलेच नाही.काल,बुधवारी २१ मे रोजी सकाळी २६ वर्षीय शारदा दामोधर पुंडे ही कर्तव्यावर जाण्यासाठी आपल्या दुचाकी क्रमांक-एमएच ४९ बीजी ७६४५ या दुचाकीने गावाहून निघाली.मात्र तुमसर-तिरोडा मार्गावरील सरांडी येथे तिचेवर काळाने झडप घातली. विरुद्ध दिशेने येणाऱ्या ट्रकने तिला चिरडले.त्यात तिचा जागीच मृत्यू झाला.तर अपघातग्रस्त त्याच ट्रकने एका म्हशीला जबर धडक दिली.त्यात म्हशीचा सुद्धा जागीच मृत्यू झाला.अपघाताची माहिती कुटूंबियांना होताच कुटुंबियांनी एकच हंबरडा फोडला.घटनेने कुटूंबात स्मशान शांतता पसरली,सासरी गेलेल्या चुलत बहिणीने ओल्याच मेहंदीने परत येऊन बहिणीच्या तिरडीला खांदा दिला.अखेर शवविच्छेदनानंतर मृतक तरुणीच्या पार्थिवावर शोकाकूल वातावरणात अंत्यसंस्कार पार पडला.यावेळी उपस्थितांचे डोळे पानावले होते.तिरोडा पोलिसांनी ट्रक व चालक यांना ताब्यात घेतले.मृतक शारदा हिचे दोन्ही भाऊ नोकरीवर आहेत.एक भाऊ पोलीस उपनिरीक्षक तर दुसरा भाऊ सैन्यात आहे.तर एक बहिण पोलीस उपनिरीक्षक व दुसरी बहिण वनविभागात कार्यरत आहे.तर शारदा ही दहा महिन्याअगोदर स्पर्धा परिक्षेतून पाटबंधारे विभागात नियुक्ती होऊन तिरोडा येथे कार्यरत होती.तिच्या मृत्यूने गावात शोककळा पसरली असून पानावलेल्या डोळ्यांनी तिला अखेरचा निरोप दिला.