उद्रेक न्युज वृत्त
घुग्घुस(चंद्रपूर) :- वारंवार वीजपुरवठा खंडित होत असल्याने नागरिक त्रस्त झाले.ही बाब सरपंचाच्या जिव्हारी लागली आणि चक्क सरपंचाने वीज कर्मचाऱ्याला गावातील वीज खांबाला बांधले.एवढेच नाही तर अश्लील शिवीगाळ तसेच मारण्याची धमकी दिली.ही घटना चंद्रपूर जिल्ह्यातील घुग्घुस जवळील नकोडा गावात शनिवारी घडली.याप्रकरणी वीज कर्मचाऱ्याच्या तक्रारीवरून सरपंच किरण बांदूरकर यांच्यासह अन्य दोघांवर गुन्हा दाखल करण्यात आला आहे.दरम्यान, गुन्हा दाखल होताच सरपंच फरार आहे.
मागील चार वर्षांपासून वीज कर्मचारी सूरज परचाके हे नकोडा व उसगाव येथे लाईनमन म्हणून कार्यरत आहे.दोन्ही गावासाठी एकच लाईनमन आहे.गावातील वीजपुरवठा वारंवार खंडित होण्याबरोबर अनेक तक्रारी असतात.त्यामुळे नागरिकांमध्ये रोष आहे.शनिवारी दुपारी उसगाव येथे वीज कर्मचारी परचाके जात असताना नकोडा येथील सरपंच किरण बांदूरकर तसेच अन्य दोघांनी रस्त्यात अडवून त्यांना नकोडा येथे आणले.त्यानंतर एका वीज खांबाला बांधून अश्लील शिवीगाळ केली.यावेळी मारण्याची धमकी दिली.दरम्यान, याचवेळी पोलिसांची गस्त असल्याचे लक्षात येताच वीज कर्मचाऱ्याला सोडून देण्यात आले. माहिती होताच स्थानिक वितरण कार्यालयातील सहायक अभियंता नयन भटारकर हे आपल्या कर्मचाऱ्यांसह गावात पोहोचले.त्यानंतर सरपंच बांदूरकर यांच्याविरुद्ध घुग्घुस पोलिस स्टेशनमध्ये तक्रार दाखल केली.तक्रार दाखल होताच पोलिसांनी बांदूरकरसह अन्य दोघांवर गुन्हा दाखल केला.मात्र, घटनेनंतर सरपंच बांदूरकर फरार असून,पोलिसांनी दोन पथके तयार करून शोध सुरू केला आहे.
