धक्कादायक घटना…! गोठ्यात बांधलेल्या शेळ्यांवर लांडग्यांनी चढवला हल्ला; २५ शेळ्या केल्या फस्त..

भंडारा :-भंडारा जिल्ह्यातील लाखांदूर

तालुक्यातील मोहरणा येथे धक्कादायक घटना घडली. घराशेजारील गोठ्यात बांधलेल्या शेळ्यांवर १० ते १२ लांडग्यांनी हल्ला चढवून २५ शेळ्यांचा फडशा पाडला.यात सोनाबाई भैय्याजी शंभरकर या शेळीपालक महिलेचे दोन लाखांपेक्षा जास्त रुपयांचे नुकसान झाले आहे.

वनपरिक्षेत्र लाखांदूर,जि.भंडारा अंतर्गत येत असलेल्या मोहरणा परिसरात लांडग्यांची संख्या अधिक वाढली आहे.परिणामी गेल्या अनेक दिवसांपासून परिसरात शेळ्यांवर हल्ल्याच्या घटना घडल्या आहेत.मोहरणा येथील सोनाबाई भैय्याजी शंभरकर या शेळी पालनाचा व्यवसाय करीत आपला उदरनिर्वाह करतात.रात्रीच्या सुमारास दहा ते बारा लांडग्यांनी गोठ्यात बांधलेल्या शेळयांवर हल्ला चढवून २५ शेळ्यांचा जागीच फडशा पाडला. लांडग्यांनी केलेल्या हल्ल्यात सर्वत्र मृत शेळ्यांचे अवयव छिन्नविछिन्न अवस्थेत पडून होते.

घटनेची माहिती लाखांदूर वन विभागाला देण्यात आली.वनरक्षक जी.डी.हत्ते यांनी घटनास्थळी दाखल होत पंचनामा केला.मोहरणा परिसरात लांडग्यांच्या हैदोसामुळे शेळीपालक त्रस्त झाल्याने वन विभागाने बंदोबस्त करावा तसेच सोनाबाई शंभरकर यांना तात्काळ आर्थिक मदत करावी; अशी मागणी ग्रामस्थांनी केली आहे.