चक्क पोलिस चौकीतच खेळू लागले जुगार… – दोन पोलीस अंमलदार तडकाफडकी निलंबित

नागपूर :-आपण नेहमी बघत असतो की,जुगार खेळणारे एखाद्याच्या घरी,सार्वजनिक ठिकाणी वा कुठेतरी आडोशाला बसून जुगार खेळतांना आढळून येतात.मात्र,एका घटनेने एकच खळबळ उडाली आहे. दोन पोलीस अंमलदार कर्तव्य बजावण्याचे सोडून चक्क पोलीस चौकीतच जुगार खेळत असल्याचा व्हिडिओ वायरल झाल्याने जुना कामठी रोडवरील कळमना पोलिस चौकीत जुगार खेळणाऱ्या दोन पोलिस अंमलदारांना झोन-५ चे पोलिस उपायुक्त अनिकेत कदम यांनी काल,सोमवारी तडकाफडकी निलंबित केले आहे.दरम्यान, जुगार खेळणाऱ्या दोन निलंबित पोलिसांव्यतिरिक्त आणखी किती पोलिस तेथे होते? याचा शोध घेण्यासाठी या प्रकरणाची चौकशी कामठी विभागाचे सहायक पोलिस आयुक्त विशाल क्षीरसागर यांच्याकडे सोपविण्यात आली आहे.

मनोज घाडगे आणि शाहू साखरे अशी निलंबित करण्यात आलेल्या पोलिस अंमलदारांची नावे आहेत. कळमना पोलिस ठाण्यात दोन पोलिस अंमलदार वर्दी घालून जुगार खेळत असल्याचा व सिगारेट पित असल्याचा व्हिडीओ सोशल मीडियावर व्हायरल झाल्यामुळे नागपूर शहर पोलिस विभागात खळबळ उडाली.परंतु हा व्हिडीओ कळमना पोलिस ठाण्यातील नसून तो जुना कामठी मार्गावरील कळमना पोलिस चौकीतील असल्याचे उघड झाले आहे.

झोन ५ चे पोलिस उपायुक्त निकेतन कदम यांनी या पोलिस चौकीला भेट देऊन पाहणी केली.ही पोलिस चौकी एक सिंगल रूम आहे.तेथे तक्रार देण्यासाठी कोणीही जात नाही.व्हिडीओत जुगार खेळताना घाडगे आणि शाहू साखरे यांच्यासोबत आणखी काही जणांचे आवाज ऐकू येत असल्यामुळे यात आणखी काही पोलिस सहभागी असल्याचा संशय व्यक्त करण्यात येत आहे.