अन् नंदी दूध व पाणी पितो तेव्हा…. – अफवा की चमत्कार…

भंडारा :-तुमसर शहरात व काही गावात भगवान शंकराचे वाहन असलेली नंदीची मूर्ती दूध पीत असल्याची अफवा सोशल मीडियावर व्हायरल झाली आहे.या व्हिडीओमध्ये नंदीची मूर्ती दूध पीत असल्याचा भक्तांचा दावा करून चमच्याने दूध पाजत असल्याचे दिसून येते.ही घटना तुमसर शहरासह हिंगणा या गावातील असून हा व्हिडीओ व्हायरल झाल्यापासून अनेक भक्त मोठ्या संख्येने मंदिरात पोहोचून नंदीला दूध पाजत असल्याचे पाहावयास मिळत आहे.सध्या श्रावण महिना सुरू असून शिवभक्त हे मंदिरातील शिवपिंडी आणि नंदीची पूजा करून पाणी व दूध अर्पण करतात.दरम्यान, अशाच एक घटनेत एका इसमाने नंदीमूर्ती दूध पीत असल्याचा व्हिडिओ बनवून तो सोशय मीडियावर टाकला.हा व्हिडिओ व्हायरल होऊन अनेक भाविक हे शिवमंदिराकडे धाव घेऊन दूध व पाणी नंदीला पाजत असल्याचे दिसून आलेभक्त नंदीला दूध पाजत असताना चमचा वाकवल्यावर दूध कमी होते; पण जेव्हा चमचा सरळ धरला तेव्हा दूध तसेच राहते; असे या व्हिडीओमध्ये दिसून येत आहे.

मंदिरातील मूर्ती दूध किंवा पाणी पीत असल्याची अफवा पसरल्याची तुमसर शहरातील ही पहिलीच घटना नाही.गेल्या वर्षीही जुलै महिन्यात शिवमंदिरांमध्ये देवाने दूध पिल्याची अफवा वेगाने पसरली होती.मूर्तीचा वरच्या भागात दूध किंवा पाणी सोडल्यास ते खाली जाते; असा नियम आहे.मात्र,काही लोक या घटनेला चमत्काराशी जोडतात.