उद्रेक न्युज वृत्त
चंद्रपूर :- सिंदेवाही तालुक्यातील खांडला येथील युवक मोटारसायकलने पुरकेपारवरून आपल्या गावाकडे परत जात असताना रस्त्यावर बिबट बसलेला दिसताच त्यांची भंबेरी उडाली. शेवटी गावातील लोकांना फोन करून बोलाविल्यानंतर त्यांच्यासह तो गावात परतला.हा प्रकार दोन दिवसांपूर्वी सायंकाळी ६:३० वाजेच्या सुमारास घडला.
खांडला येथील अजय मेश्राम सायंकाळी ६:३० ते ७ च्या दरम्यान दुचाकीने पुरकेपारवरून स्वगावी जात असताना रस्त्यावर बिबट बसला असल्याचे दिसले. काही वेळ दोघेही एकमेकांकडे बघत राहिले.शेवटी जिवाच्या भीतीने अजयने दुचाकी परत फिरवली व दूरवर जाऊन वडिलांना फोन करून माहिती दिली. शेवटी त्याचे वडील व गावातील नागरिक त्याला घ्यायला आले आणि त्यांच्यासह तो सुखरूप खांडला येथे पोहोचला.रत्नापूर खांडला रस्त्यालगत बुधवारी बिबट्याने गायीची शिकार केली होती.त्यामुळे बिबट या परिसरातच आहे.अगदी रस्त्यालगत शिकार केल्याने खांडला सरांडी येथील विद्यार्थी शिक्षणासाठी नवरगावला ये- जा करतात.त्यातील काही विद्यार्थ्यांनाही या बिबट्याने दर्शन दिल्याने या रस्त्याने ये-जा करणाऱ्यांमध्ये भीतीचे वातावरण पसरले आहे.
