उद्रेक न्युज वृत्त
चंद्रपूर :- मागील आठवडाभरापासून चंद्रपूर जिल्ह्यात हत्येचे सत्र सुरू आहे.ब्रह्मपुरी,गोंडपीपरी, बल्लारपूर नंतर आता चंद्रपूर शहरात युवकाची धारदार शस्त्राने हत्या केल्याची घटना उघडकीस आली आहे. अष्टभुजा वॉर्ड निवासी सूरजसिंह कुंवर वय २५ वर्षे, असे मृतकाचे नाव आहे.या प्रकरणी रामनगर पोलिसांनी ५ आरोपींना अटक केली असून यामध्ये अल्पवयीन मुलाचाही समावेश आहे.
पोलिसांनी दिलेल्या माहितीनुसार,सूरजसिंह कुंवर व आरोपी हे एकमेकांचे मित्र होते.शुक्रवारी रात्री मृतक सूरजसिंह कुंवर हा मित्रांसोबत दारूची पार्टी करीत होता.दरम्यान आपसात त्यांच्यामध्ये भांडण झाले. भांडणाचे रूपांतर मारहाणीत झाले.त्यांनतर आरोपीनी धारधार शस्त्राने सूरजची हत्या केली.हत्या केल्यावर आरोपींनी सूरजचा मृतदेह अष्टभुजा येथील मनपाच्या डम्पिंग यार्ड येथे कचऱ्याच्या खड्यात टाकला,जेणेकरून कुणाला मृतदेह मिळणार नाही. मात्र शनिवारी घटनास्थळावर परिसरातील नागरिकांना रक्ताचा सडा आढळून आल्याने याबाबत पोलिसांना माहिती देण्यात आली.रामनगर पोलिस तत्काळ अष्टभुजा येथे दाखल झाले.त्यांनी तपास सुरू केला असता सूरजसिंह हा सकाळपासून दिसला नसल्याचे आढळून आले,सखोल व गोपनीय माहितीच्या आधारे पोलिसांनी मृतदेह डम्पिंग यार्ड मधून शोधून काढला.रात्री सूरज कुणासोबत होता.याबाबत माहिती काढली असता; या प्रकरणात अविनाश सोनटक्के,आदर्श हलधर,धम्मदीप उर्फ राजा इंगळे व अभिषेक मेहता यांना अटक करण्यात आली.
