चक्क चोरट्यांनी खासदारांच्या शेतातील वीज मीटरसह मोटरपंप नेला चोरून.

भंडारा :-जिल्ह्यात चोरीच्या घटनांनी जोर धरलेला असतांनाच आता थेट लोकप्रतिनिधीही यातून सुटलेले नाहीत.भंडारा-गोंदिया लोकसभा क्षेत्राचे खासदार डॉ.प्रशांत पडोळे यांच्या वडिलोपार्जित शेतातून अज्ञात चोरट्यांनी चक्क वीज मीटरसह मोटरपंप चोरून नेल्याची धक्कादायक घटना समोर आली आहे.भंडारा शहराजवळील बायपास मार्गावर डॉ.प्रशांत पडोळे यांची वडिलोपार्जित शेती आहे.या शेतातील पिकांना पाणी देण्यासाठी आणि जनावरांच्या पिण्याच्या पाण्याची सोय करण्यासाठी मोटरपंप व विजेसाठी मिटर बसविण्यात आला होता.अश्यातच आज गुरुवारी खासदार पडोळे हे शेतावर फेरफटका मारण्यासाठी गेले असता,तेथील मोटरपंप आणि वीज मीटरच चोरीला गेल्याचे उघडकीस आले.जिल्ह्यात गेल्या काही दिवसांपासून घरफोडी आणि शेती साहित्याच्या चोरीच्या घटनांमध्ये मोठी वाढ झाली आहे.आता थेट खासदारांच्याच शेतात चोरी झाल्याने सामान्य नागरिकांच्या सुरक्षेचा प्रश्न ऐरणीवर आला आहे.