सिंदेवाहीत अभियंता दिन उत्साहात साजरा.. – गडबोरीच्या विद्यार्थ्यांना नवोदय मार्गदर्शिका व शैक्षणिक साहित्याचे वाटप..

सिंदेवाही(चंद्रपूर):-सार्वजनिक बांधकाम विभागाच्या वतीने भारतरत्न सर मोक्षगुंडम विश्वेश्वरय्या यांच्या जयंतीनिमित्त १५ सप्टेंबर रोजी अभियंता दिन उत्साहात साजरा करण्यात आला.यानिमित्त गडबोरी येथील जिल्हा परिषद शाळेत सर विश्वेश्वरय्या यांच्या प्रतिमेचे पूजन करण्यात आले. यावेळी विद्यार्थ्यांना नवोदय प्रवेश परीक्षेच्या तयारीसाठी मार्गदर्शक पुस्तिका,शैक्षणिक साहित्य तसेच खाऊचे वाटप करण्यात आले.

यानंतर सिंदेवाही येथील सार्वजनिक बांधकाम उपविभागीय कार्यालयात अभियंता दिनाचा कार्यक्रम आयोजित करण्यात आला.कार्यक्रमाच्या सुरुवातीला सर मोक्षगुंडम विश्वेश्वरय्या यांच्या प्रतिमेचे पूजन करून अभिवादन करण्यात आले.यावेळी विविध शासकीय विभागांत कार्यरत अभियंत्यांचा सत्कार करून त्यांच्या कार्याचा गौरव करण्यात आला.

कार्यक्रमात उपविभागीय अभियंता षटगोपनवार, बांधकाम विभागाचे येढे व खुणे,सिंदेवाही पोलीस ठाण्याचे ठाणेदार पांडे तसेच सिंदेवाही नगरपंचायतीचे आंबोरकर यांची प्रमुख उपस्थिती होती.मान्यवरांनी अभियंता दिनाचे महत्त्व,अभियंत्यांची विकासातील भूमिका तसेच विद्यार्थ्यांनी तांत्रिक व वैज्ञानिक दृष्टिकोन विकसित करण्याची गरज यावर मार्गदर्शन केले.यावेळी विविध विभागांतील अभियंत्यांनी मनोगत व्यक्त केले.

कार्यक्रमाच्या यशस्वी आयोजनासाठी उपविभागीय अभियंता षटगोपनवार,शाखा अभियंता वानखेडे, रामटेके,सहाय्यक अभियंता बिराजदार,सहाय्यक हागे, सामाजिक कार्यकर्ते संजय पुपरेड्डीवार तसेच प्रशांत गेडाम यांनी सहकार्य केले.कार्यक्रमानंतर उपस्थितांसाठी स्नेहमेळाव्याचे आयोजन करण्यात आले.