सिंदेवाहीच्या विकासातील योगदानाबद्दल उपविभागीय अभियंता षटगोपमावार यांचा गौरव.. – मित्र परिवार व नागरिक मंचचा स्तुत्य उपक्रम..

सिंदेवाही(चंद्रपूर):-देशाच्या ८० व्या स्वातंत्र्यदिनाच्या पर्वावर सिंदेवाही येथील मित्र परिवार व नागरिक मंचच्या वतीने सार्वजनिक बांधकाम विभागाचे उपविभागीय अभियंता षटगोपमावार यांचा विशेष सन्मान करण्यात आला.सिंदेवाही तालुक्यातील विविध महत्त्वपूर्ण विकासकामांमध्ये दिलेल्या उल्लेखनीय योगदानाबद्दल षटगोपमावार यांचा शाल,श्रीफळ व स्मृतिचिन्ह देऊन गौरव करण्यात आला.तालुक्याच्या विकासासाठी त्यांनी केलेल्या कार्याची दखल घेत मित्र परिवार व नागरिक मंचच्या वतीने त्यांचे अभिनंदन करण्यात आले.यावेळी उपस्थित नागरिकांनी सिंदेवाही तालुक्याच्या विकासासाठी सार्वजनिक बांधकाम विभागाच्या माध्यमातून सुरू असलेल्या विविध कामांमध्ये अधिकारी म्हणून षटगोपमावार यांनी बजावलेल्या भूमिकेचे कौतुक केले.विकासकामांना चालना देणाऱ्या अधिकारी, कर्मचाऱ्यांचा अशा प्रकारे गौरव केल्याने त्यांना भविष्यात आणखी चांगले काम करण्यासाठी प्रेरणा मिळते,अशी भावना उपस्थितांनी व्यक्त केली.

स्वातंत्र्यदिनाच्या पावन पर्वावर विकासासाठी योगदान देणाऱ्या अधिकाऱ्याचा करण्यात आलेला हा सन्मान परिसरात कौतुकाचा विषय ठरला आहे.तसेच अधिकारी, कर्मचाऱ्यांना प्रोत्साहन देण्याचा आणि त्यांच्या कार्याचा गौरव करण्याचा आदर्श संदेश सिंदेवाही मित्र परिवार व नागरिक मंचाने दिला.